Snorri Másson, þingmaður Miðflokksins, gagnrýnir framgöngu Samtakanna 78 gegn konu sem efnt hefur til ritdeilna á netinu um transmálefni.
Kristína Ösp Steinke stýrir félagasamtökunum Andrými á Akureyri. „Þau hafa haldið regluleg námskeið í margs konar hæfni og kunnáttu sem hjálpar fólki að reka heimili, í betri nýtni, sjálfbærni og að hlúa að almennri heilsu. Markmiðið er að sögn einnig að standa vörð um aldagamlar aðferðir í handverki sem eru að týnast meðal nýrra kynslóða. Um leið eru innflytjendur virkir þátttakendur í starfinu og öðlast þar með tengingu við samfélag heimamanna,“ segir Snorri um starfsemi samtakanna í grein sem hann birtir á Vísir.is.
Snorri upplýsir að starfsemi samtakanna hafi einkum farið fram á Amtsbókasafninu á Akureyri og hafa þar verið haldnir hinir ýmsu viðburðir og námskeið um þjóðlegt handverk. Á sama tíma hefur Kristín staðið í ritdeilum við Samtökin 78 um réttindi trans fólks.
Snorri birtir bréf sem Samtökin 78 sendu Akureyrarbæ, en það er svohljóðandi:
„Okkur hjá Samtökunum ’78 hefur borist ábending frá félaga í Samtökunum um að forsvarsfólk Andrými sem er í samstarfi við Amtsbókasafnið á Akureyri sýni af sér afar óviðeigandi ummæli um trans fólk og þá aðallega trans konur á opnum samfélagsmiðlum sínum. Nú er Akureyrarbær að setja á laggirnar í fyrsta sinn hinsegin hátíð núna í sumar og er því ólíkleg að slík orðræða samræmist stefnu opinberrar stofnunar í eigu Akureyrarbæjar.
Meðfylgjandi eru skjáskot af ýmsum ummælum forsvarsfólks Andrými. Er það krafa Samtakanna ’78 að forsvarsfólk Amtsbókasafnsins taki föstum tökum á þeirri stöðu sem upp er komin.“
Í kjölfarið fékk Kristína eftirfarandi póst frá bæjaryfirvöldum á Akureyri:
„Okkur hafa borist ábendingar um að stofnendur og skipuleggjendur viðburða hjá Andrýminu sýni af sér hatursorðræðu og afar óviðeigandi ummæli um trans fólk á samfélagsmiðlum. Þetta stangast á við stefnu Amtsbókasafnsins og Akureyrarbæjar. Okkur langar að heyra hvernig þið bregðist við þessum ábendingum?“
Segir Snorri að málið sé til skoðunar og ekki hafi verið tekin ákvörðun um að meina Kristínu um aðgang að húsnæði bókasafnsins.
Snorri segir skiljanlegt að Samtökin 78 lýsir yfir óánægju með skrif Kristínar á netinu, hins vegar hafi hún ekki hlotið dóm fyrir hatursorðræðu né eigi hún yfir höfði sér kæru þess efnis. Snorri segir:
„Að Samtökin 78 lýsi yfir óánægju með málflutninginn er vel skiljanlegt en spurningin er hvenær opinberum aðilum skal blandað í ritdeilur á netinu? Réttlætir umræða á samfélagsmiðlum kröfu samtakanna um að bæjaryfirvöld grípi til aðgerða gegn Kristínu, þegar ummæli hennar tengjast ekki að neinu leyti þeirri starfsemi sem hún hefur fengið að stunda í húsnæði bæjarins?“
Snorri lýsir yfir miklum efasemdum um að harkaleg tjáning um samfélagsmálefni sé lögmætur grundvellur þess að borgarar séu útilokaðir frá opinberri þjónustu eins og farið sé fram á í þessu tilviki. Hann segist hafa mikilvæga skyldu sem þingmaður til að verja rétt borgaranna til að tjá sig og vekur hann því athygli á málinu.
Grein Snorra má lesa hér.
