Í aðsendri grein á vef Vísis segist hún geta sagt mjög margt um nýju vinnuna sem hún kveðst vera ákaflega stolt af. Á Alþingi starfi mikið af öflugu fólki úr ólíkum áttu, verkefnin séu spennandi og krefjandi og þar fái hún að kynnast ýmsum krókum og kimum samfélagsins á allt annan hátt en áður.
„Það er þó eitt við þetta starf sem ég er enn að reyna að skilja. Það er það hvernig sumir þingmenn sem eru kjörnir á Alþingi til þess að vinna að hag þjóðarinnar finna sig knúna til þess að tefja framgang mála með innihaldslausu rausi í ræðustól Alþingis. Meira að segja í þeim málum sem samhljómur er um að séu mikilvæg eins og mörg þeirra sem hafa verið til umræðu síðustu vikur, síðast í gær um fríverslunarsamning EFTA-ríkjanna við Taíland, svo ekki sé minnst á plasttappamálið svokallaða,“ segir Ása Berglind í grein sinni.
Hún bendir á að síðan hún byrjaði hafi hún lært að hefðbundin málsmeðferð þingmála sé að þau komi í þingsal í fyrstu umræðu og fari svo í viðeigandi nefndir þar sem þau fá ítarlega umfjöllun þingmanna sem byggir meðal annars á umsögnum almennings, fyrirtækja og hagsmunaaðila.
„Í umfjöllun nefndanna er hægt að kalla eftir frekari gögnum og greiningum og kafa vel ofan í málin. Því næst fara málin í aðra umræðu inn í þingsal og ef þau breytast að einhverju leyti í þeirri umræðu þá fara þau aftur til umfjöllunar hjá viðeigandi nefnd áður en málin fara í þriðju og síðustu umræðu í þingsal,“ segir Ása og bætir við allt ferlið, frá fyrstu umræðu í þingsal til þeirrar þriðju, þurfi að klárast innan starfsársins, annars þurfi að byrja aftur á byrjunarreit á næsta þingi.
„Nú vill svo til að hér urðu valdaskipti og verkstjórn Samfylkingar, Viðreisnar og Flokks fólksins hefur komið með fjöldann allan af málum sem hafa mest megnis verið í fyrstu umræðu síðustu vikurnar. Þrátt fyrir að allir þingmenn geti haft ótal snertifleti við þessi tilteknu mál í því ferli sem bíður þeirra, þá leika sumir þeirra nú þann leik að mása sig hása í ræðustól Alþingis hver á eftir öðrum með endalausum endurtekningum og útúrdúrum til þess að koma í veg fyrir að ríkisstjórnin, sem var kjörin af meirihluta þjóðarinnar, geti unnið fyrir land og þjóð og komið málunum áfram. Mikilvægum framfaramálum eins og leiðréttingu veiðigjalda sem þjóðin styður í miklum meirihluta,“ segir Ása.
Hún kveðst ekki geta annað en velt fyrir sér virðingu þeirra sem leika þennan leik gagnvart tíma fólks sem starfar á Alþingi. Bendir hún á að það séu ekki bara þingmenn sem séu að störfum fram á kvöld og jafnvel nótt dag eftir dag heldur mikið af starfsfólki Alþingis.
„Ég spyr mig hvernig þingmenn sem kjósa að nýta tímann sinn með þessum hætti geti horft framan í fólkið í landinu sem greiðir okkur himinhá laun, og ég hugsa líka hvort þessu sama fólki þætti nýting á tíma starfsfólks, framlegð og árangur ásættanlegur ef hér væri um að ræða fyrirtæki sem þau væru að reka? Hvað finnst þér?“
