Í pistli á Facebook sagði Kristinn að landsliðskonur Ísraels hefðu ef til vill ekki tekið beinan þátt í skefjalausu morðæði gegn íbúum Gaza. Þær séu samt hluti af þeirri vél.
„Þær mæta inn á völlinn með blóð barna á höndunum og þaðan mun það blóð berast til ykkar þegar boltinn fer á milli – ef þið leikið á móti þeim. Ekki fara í þennan leik. Ég veit að þetta virðist stór bón en lítið á þetta sem stórt tækifæri, möguleika á því að senda svo kröftug skilaboð til heimsins alls að eftir þvi verður tekið,“ sagði hann.
Sjá einnig: Kristinn sendir ákall til íslenskra landsliðskvenna:„Ekki fara í þennan leik“
Valur Páll Eiríksson, íþróttafréttamaður á Vísi, skrifaði pistil um málið í morgun þar sem hann fór ekki í grafgötur með það að íslenska liðið væri sett í þrönga stöðu gegn sínum vilja. Kominn væri tími á að alþjóðleg íþróttahreyfing tæki sig saman í andlitinu og vísi Ísrael úr keppni og skiljanlega sé kallað eftir sniðgöngu vegna þess sem gengur á í Palestínu.
Hann vísar svo í orð Kristins og segir að staldra þurfi við þegar blóð er sagt á höndum leikmanna íslenska liðsins vegna komandi leikja.
„Það má velta fyrir sér sanngirninni í því að varpa allri ábyrgð til leikkvenna íslensks landsliðs sem ætlar sér á heimsmeistaramót og varð fyrir því óláni að dragast gegn Ísrael. Íþróttakonur sem eru settar í ómögulega stöðu og þora vart að koma í viðtöl af ótta við viðbrögð almennings. Að segja að hendur þeirra verði ataðar palestínsku blóði við að mæta ísraelsku liði er ósanngjarnt. Auðvitað þarf einhver að stíga skrefið en sú ábyrgð liggur hjá íslenskri íþróttahreyfingu og íslenskum stjórnvöldum, sem hafa verið jafn áberandi aðgerðalaus,” sagði Valur Páll í pistli sínum.
Nú hefur Kristinn birt aðra færslu þar sem hann segir hreint ekki svo ósanngjarnt að halda því fram að kvennalandslið Ísraels mæti með blóðugar hendur og það berist blóðið á hendur íslensku stelpnanna ef þær hunsa ekki leikinn.
„Íslensku stelpurnar eru að keppa við fulltrúa þjóðarmorðingja og fulltrúa Ísraelshers (IDF). Vegna þess að þar í landi er almenn herskylda hafa þessar ísraelsku gengt herskyldu. Nema þær hafi fengið undanþágu sem er óalgengt. Listi yfir leikmenn Ísraels er nokkuð falinn en ég fann þó mynd af fyrirliða liðsins í búningi hersins,“ segir hann.
Hann segir að öll þátttaka Ísraels í menningar- og íþróttaviðburðum sé hluti af því áróðursstríði að réttlæta þjóðarmorðið. Hann tekur undir með Vali Páli um að HSÍ hafi ekki tekið af skarið og sett íslenska liðið í þesa stöðu. Þá sé það einnig rétt að það sé óþolandi að alþjóðlegu íþróttasamtökin taki ekki af skarið.
„Það er samt ekkert ósanngjarnt að biðja þessar ungu konur að láta ekki tækifærið fram hjá sér fara og mótmæla. Þú telur að þau mótmæli skipti engu máli og ekki nokkur maður taki eftir þeim. Það tel ég að öllum líkindum rangt og auk þess aukaatriði. Ef allir hugsuðu þannig að tillegg þeirra í sjálfsagða mannréttindabaráttu skipti engu máli myndi engin árangur nást. Það er uppgjöf sem þjónar þjóðarmorðingjunum.
Ég var að biðja þessar ungu konur að færa fórn. Hversu stór er hún? Hversu stór er sú fórn að eiga að baki það móment að geta minnst með stolti að hafa fylgt sannfæringu sinni? Er það ekki tækifæri fremur en fórn,” spyr Kristinn.
