Margrét Halla Hansdóttir Löf, 28 ára gömul kona sem situr í gæsluvarðhaldi vegna andláts föður hennar, Hans Roland Löf, þann 11. apríl síðastliðinn, er sögð játa að hafa beitt foreldra sína ofbeldi en neitar því að hafa banað föður sínum.
Heimildin greinir frá þessu.
„Dánarorsök föður Margrétar, Hans Roland Löf, er ekki ljós þar sem enn er beðið eftir niðurstöðu krufningar, en fyrir liggur að hann fékk hjartastopp samkvæmt upplýsingum Heimildarinnar og hneig niður þar sem hann ætlaði að yfirgefa heimilið. Þá segja heimildir að Margrét haldi því fram hún hafi ekki verið nærri föður sínum þegar hann hné niður, en þó stödd í sama húsi,“ segir í frétt Heimildarinnar.
Margrét er sögð játa atvikalýsingu að hluta, sem varðar ofbeldi gegn foreldrum hennar yfir ákveðið tímabil.
Móðir Margrétar hringdi í neyðarlínuna föstudagsmorguninn 11. apríl en þá var Hans Roland þungt haldinn. Hann lést sama dag eftir að hafa verið lagður inn á sjúkrahús. Samkvæmt heimildum Heimildarinnar fékk hann hjartastopp. Niðurstöður krufningar liggja hins vegar ekki fyrir og ósannað er í augnablikinu að Margrét hafi veitt honum áverka sem leiddu til dauða hans.
Talið er að Margrét hafi beitt foreldra sína ofbeldi, andlegu og líkamlegu, yfir langt tímabil. Hún hefur verið úrskurðuð í gæsluvarðhald til 7. maí.
