Tvær konur voru í gönguferð með Maltese hunda annarrar þeirra á Hólmsheiði í gær. Gengu þær fram á karlmann á breyttum jeppa sem var búinn að keyra um svæðið og tæta það upp. 

Hundarnir voru í lausagöngu og segir önnur þeirra hundana hafa verið hætt komna vegna aksturs mannsins.

„Ég er í svo miklu sjokki vinkona mín var með Maltese hundana sína í lausagöngu á Hólmsheiði í gær þar var maður á breyttum stórum jeppa að tæta upp svæðið hann var næstum búinn að keyra yfir hunda frá henni með gáleysislegum akstri sem er bannaður þarna. Svo hélt hún áfram göngu sinni og þegar hún snýr til baka þá var hann enn að spæna upp svæðið svo að hún forðaði sér bara heim. Við erum með bílnúmerið og vídeóið segir allt sem segja þarf!!!“

segir Íris Vanja Valgeirsdóttir í færslu í Facebook-hópnum Hundasamfélagið. Í myndbandinu má sjá djúp og löng hjólför eftir akstur mannsins.

Í samtali við DV segir Íris þær vinkonurnar ekki hafa haft nein samskipti við ökumanninn. Vinkona hennar hafi verið með fimm hunda og einn þeirra hafi farið einu sinni undir bílinn. 

„Hún fattaði ekki að tilkynna þetta fyrr en hún kom heim hún var í svo miklu sjokki,“ segir Íris sem segir lögregluna hafa þakkað vinkonu hennar fyrir ábendinguna, en ekki haft samband aftur. 

Samkvæmt 1. málsgrein 31. greinar náttúruverndarlaga er akstur vélknúinna ökutækja utan vega óheimill. Sektir eða fangelsi geta legið við slíku athæfi samkvæmt 90. grein laganna. Umhverfisstofnun tekur við ábendingum um akstur utan vega, bæði atvikum þar sem fólk hefur orðið vitni að akstri en einnig ef fólk telur sig hafa fundið nýleg för í náttúru landsins.