Lögregla verst allra frétta af rannsókn á láti manns sem fannst meðvitundarlaus í heimahúsi í Garðabæ á föstudagsmorgun. Dóttir mannsins, sem samkvæmt heimildum DV er fædd árið 1997, var handtekin á vettvangi og á föstudagskvöld var hún úrskurðuð í gæsluvarðhald til 16. apríl, eða til miðvikudags.

Elín Agnes Eide Kristínardóttir, yfirlögregluþjónn á rannóknarsviði lögreglunnar á höfuðborgarsvæðinu, segir rannsóknina í hefðbundnum farvegi. Lögregla verst allra frétta af rannsókninni en aðspurð segir Elín Agnes að rannsókn miði vel.

„Þetta er bara verk í vinnslu allt saman,“ svarar hún þeirri spurningu blaðamanns hvort hin grunaða hafi verið yfirheyrð.

Hún vill ekki svara því hvort lögregla gangi út frá því að um manndráp hafi verið að ræða. Hún segir málið vera flókið og viðkvæmt. „Viðkvæmt, fjölskyldulega séð,“ segir hún orðrétt í stuttu spjalli við blaðamann.

Í tilkynningu sem lögregla sendi frá sér um málið í gær segir:

„Það var snemma á föstudagsmorgun sem lögreglu barst tilkynning um meðvitundarlausan karlmann í heimahúsi á höfuðborgarsvæðinu. Viðbragðsaðilar héldu strax á staðinn, en karlmaðurinn var þungt haldinn þegar að var komið. Hann var fluttur á slysadeild og lést þar síðar um daginn. Konan, sem er í gæsluvarðhaldi, var handtekin í fyrrnefndu húsi.“