Íbúi á Kársnesi í Kópavogi segir dýravini þar mjög uggandi yfir hvarfi katta á svæðinu. Svo virðist sem minnst fjórir kettir hafi horfið sporlaust þar í marsmánuði. Kettirnir hafa ekki fundist þrátt fyrir mikla leit.

„Þessar fjórar kisur týndust allar af Kársnesinu í mars og mikið er búið að leita. Banka upp á hjá nágrönnum og biðja þá um að kíkja í geymslur og skúra. Fara með miða með upplýsingum og mynd af kisu en þær virðast hafa horfið sporlaust.

Við dýravinir erum mjög uggandi því allt eru þetta heimakærar kisur og mjög ljúfar.“

Svo segir í færslu í Facebook-hópnum Kársnesið okkar. Þar eru einnig birtar myndir af köttunum ásamt nafni eigenda þeirra og götum sem þeir búa í.

„Tígull á heima á Borgarholts- og Kársnesbraut. Eigandi Guðrún Sólveig.

Gómes á heima á Þinghólsbraut. Eigandi Þröstur Spörri og Kristín

Matthildur á heima á Ásbraut. Eigandi Bjarndís.

Góa á heima á Sunnubraut. Eigandi Ingibjörg.“