Síðdegis í gær voru björgunarsveitir á Hellu og Hvolsvelli boðaðar út eftir að aðstoðarbeiðni barst frá hópi skíðafólks á leið yfir Eyjafjallajökul að Fimmvörðuhálsi.

Á toppi jökulsins treyst einn út hópnum sér ekki til að halda áfram. Einn leiðsögumaður hélt kyrru fyrir með viðkomandi, en hópurinn hélt áfram. Kemur þetta fram í tilkynningu frá Slysavarnafélaginu Landsbjörg.

Fæti á jökli var slæmt og björgunarsveitir þurftu að fara á jökulinn á vélsleðum og snjóbílum.

Um svipað leiti barst aðstoðarbeiðni frá fólki á tveimur jeppum á svipuðum slóðum. Þau höfðu fest jeppana. Þá voru boðaðir út fleiri snjóbílar, úr Grímsnesi og Garðabæ.

Auk þess komu björgunarsveitir af höfuðborgarsvæðinu sem voru á æfingu í nágrenninu til aðstoðar.

Upp úr klukkan 19 komu fyrstu björgunarmenn á sleðum á topp Eyjafjallajökuls og var sá einstaklingur sem þar beið aðstoðar, fluttur á móti snjóbíl sem var skammt á eftir.

Gönguhópurinn sem hafði ætlað yfir á Fimmvörðuháls, hafði þá snúið við vegna veðurs og var tekin ákvörðun um að snjóbílarnir myndu taka allan hópinn niður.

Rétt fyrir klukkan 22 var allur gönguhópurinn kominn í bíla á Hamragarðaheiðinni og var hann síðan fluttur  niður að Skógum. Jepparnir tveir voru svo losaðir og eru á leið niður jökul.