Landsréttur hefur staðfest gæsluvarðhaldsúrskurð Héraðsdóms Reykjaness yfir manni sem sakaður hefur verið um að beita konu sína og fimm börn þeirra margvíslegu ofbeldi. Maðurinn kom fyrst til landsins árið 2022 og hlaut í kjölfarið alþjóðlega vernd en konan og börnin komu hingað til lands í mars 2024 og fluttu þá inn á sama heimili og maðurinn en konan yfirgaf það fljótlega vegna ofbeldis mannsins og börnin voru í kjölfarið tekin af honum. Kemur fram í úrskurðinum að maðurinn hafi ítrekað brotið gegn nálgunarbanni sem hann var látinn sæta gagnvart fjölskyldu sinni.
Lögreglan á Suðurnesjum hefur verið með mál mannsins til rannsóknar frá því í mars 2024 eftir að tilkynnt vart um líflátshótanir hans í garð eiginkonunnar.
Ekki kemur fram í úrskurðinum frá hvaða landi fjölskyldan er en maðurinn kom til landsins 2022 og hlaut alþjóðlega vernd en börnin og konan komu til hans í mars 2024 og fluttu inn á heimilið. Í sama mánuði yfirgaf konan heimilið vegna ofbeldis mannsins. Börnin voru í kjölfarið tekin af manninum og færð til móðurinnar og hafa þau dvalið síðan hjá henni. Konan og börnin hafa notið aðstoðar félagsmálayfirvalda og Kvennaathvarfsins.
Samkvæmt úrskurðinum segir konan að maðurinn hafi beitt hana líkamlegu og andlegu ofbeldi í fjölda ára áður en þau komu til Íslands. Konan segir einnig að maðurinn hafi beitt börnin ofbeldi, bæði líkamlegu og andlegu og sum þeirra kynferðislegu.
Maðurinn sætti fljótlega eftir að málið kom upp málgunarbanni gagnvart konunni en í júlí 2024 tók Lögreglustjórinn á Suðurnesjum ákvörðun um, eftir að barnavernd lagði fram kæru gegn manninum, að nálgunarbannið skyldi líka gilda gagnvart börnunum.
Er maðurinn grunaður um að hafa brotið nálgunarbann níu sinnum meðal annars með því að hóta konunni. Hann hefur verið einnig sakaður um að hóta annarri konu og áreita hana kynferðislega.
Krafðist Lögreglustjórinn á Suðurnesjum gæsluvarðhalds yfir manninum á þeim grundvelli að hann sætti nálgunarbanni gagnvart konunni og börnunum og væri jafnframt grunaður um alvarlegt ofbeldi, af líkamlegum, andlegum og kynferðislegum toga, gagnvart þeim öllum. Þá væri hann sömuleiðis grunaður um umsáturseinelti og að hafa ítrekað og endurtekið brotið nálgunarbann. Ætluð brot mannsins vörðuðu allt að 16 ára fangelsi og vægara úrræði en gæsluvarðhald dygði ekki til þar sem ætla mætti, miðað við ítrekuð brot mannsins, að hann myndi halda brotum sínum áfram og ógna öryggi konunnar, barnanna og annarra. Vægari úrræði væru fullreynd.
Vildi maðurinn hins vegar meina að á meðan nálgunarbanninu hefði staðið hefði konan sett sig margoft sett sig í samband við hann að fyrra bragði.
Var maðurinn úrskurðaður í gæsluvarðhald fram til 11. apríl næstkomandi.
