Landsréttur hefur staðfest dóm héraðsdóms sem sýknaði dótturfélag Isavia, Isavia ANS ehf, af kröfum manns sem starfaði sem flugumferðarstjóri. Krafðist hann bóta eftir að hafa verið sagt upp störfum í kjölfar þess að nemi í flugumferðarstjórn sakaði hann og annan flugumferðarstjóra um kynferðisbrot en rannsókn á því máli var felld niður.
Hluti af starfi mannsins var að sinna kennslu í flugumferðarstjórn.
Í júlí 2021 var honum sagt upp störfum fyrir alvarleg brot á siðareglum Isavia og dótturfélaga þess. Uppsögnin kom í kjölfar þess að kona sem var nemi í flugumferðarstjórn kærði manninn og annan mann sem hafði sinnt kennslu í flugumferðarstjórn fyrir kynferðisbrot sem átt hafi sér stað á heimili mannsins í júní 2020.
Konan fundaði með starfsfólki Isavia ANS ásamt föður sínum í júlí 2020. Sagðist konan á fundinum lítið muna eftir atvikum þar sem hún hefði verið í óminnisástandi en væri staðráðin í að halda málinu áfram.
Í dómi Landsréttar er því næst lýst ítarlega samskiptum mannsins við Isavia ANS í kjölfar þess að kæran var lögð fram á hendur honum. Lögð var áhersla á að tryggja vinnuumhverfið í ljósi þeirra miklu krafna sem gerðar eru til flugumferðarstjóra og þeirrar líkamlegu og andlegu heilsu. Í júní 2021 hafi fyrirtækið talið stöðuna vera orðna erfiða þar sem málið hefði spyrst út. Í kjölfar þess að héraðssaksóknari felldi niður rannsókn á málinu hafi verið tekin ákvörðun um að segja manninum upp störfum.
Fram kemur í dómnum að lýsingar í bréfi héraðssakóknara þar sem tilkynnt var um niðurfellingu málsins hafi haft úrslitaáhrif á að manninum var sagt upp. Maðurinn viðurkenndi að hafa haft samfarir við konuna og sagði samstarfsmann sinn hafa komið upp í rúm til þeirra og lagst ofan á konuna og nuddað sér upp við hana. Vildu þeir meina að konan hafi verið vel meðvituð um hvað væri að gerast og hefði verið samþykkur því.
Í bréfi héraðssaksóknara kom fram að konan hefði vaknað nakin uppi í rúmi með mönnunum sem hefðu báðir verið naktir og ekki munað hvernig hún hefði endað í þeim aðstæðum. Hún hefði síðast munað eftir í heitum potti með mönnunum á heimili mannsins sem fór í málið við Isavia ANS.
Starfsmenn félagsins neituðu fullyrðingum mannsins að honum hefði verið tjáð að ekkert yrði gert meira í málinu eftir að lá fyrir að héraðssaksóknari hefði fellt málið niður.
Í niðurstöðu Landsréttar segir að ágreiningur málsaðila hafi snúið að því hvort maðurinn hafi orðið uppvís að grófu broti í starfi samskvæmt samkomulagi gert var í tengslum við kjarasamning sem gilti um störf flugumferðarstjórans. Vísar rétturinn til að siðaregla Isavia ANS sem vísað var til í ráðningarsamningi mannsins og að þar væri kveðið á um að hann ætti að varast að framkoma hans varpaði rýrð á starf hans eða vinnuveitenda hans. Í lögum og stjórnvaldsfyrirmælum væru gerðar ríkar kröfur til flugumferðarstjóra. Í ljósi alls þessa hefði Isavia ANS verið heimilt að segja manninum upp. Sýknudómur héraðsdóms var því staðfestur og uppsögn mannsins stendur því óhögguð.
