Lögreglan á Vestfjörðum hefur sent frá sér tilkynningu vegna ástands sem skapaðist á Bolungarvík fyrr í dag þegar sérsveit ríkislögreglustjóra var kölluð út embættinu til aðstoðar. Segir í tilkynningunni að einstaklingur sem býr í bænum ásamt börnum sínum hafi talið annan einstakling sem fjölskyldunni stafaði bein ógn af væri kominn til bæjarins en svo hafi ekki reynst vera.

Segir í tilkynningunni að á níunda tímanum í morgun hafi lögreglunni á Vestfjörðum borist tilkynning frá einstaklingi sem taldi sér og börnum sínum ógnað. Fjölskyldan búi í Bolungarvík.

Tilkynnandinn hafi talið að ákveðinn aðili, búsettur erlendis, væri kominn til Bolungavíkur og vildi vinna fjölskyldunni mein.

Fjórir lögreglumenn hafi þá þegar haldið frá Ísafirði á vettvang og verið viðbúnir því að þurfa að grípa til vopna. Til öryggis hafi sérsveit ríkislögreglustjóra verið kölluð til aðstoðar, en hún verið flutt með þyrlu Landhelgisgæslunnar vestur.

Öryggi fjölskyldunnar og íbúa í Bolungarvík hafi verið tryggt meðan leitað var þess aðila sem tilkynnt var um.

Eftir mikla upplýsingaöflun lögreglunnar í dag sé niðurstaðan sú að tilkynnandinn hafi ekki metið aðstæður rétt og sá aðili sem ógnin var talin stafa af sé ekki á landinu.

Aðgerðum lögreglu sé lokið.