Pósturinn tengir saman fólk, fyrirtæki og samfélög og fer heim til allra landsmanna að minnsta kosti tvisvar sinnum í viku allt árið um kring.
Íslandspósti hefur verið falið það hlutverk fyrir hönd ríkisins að sinna alþjónustu á Íslandi til ársins 2030, fyrir sendingar bæði innanlands og til annarra landa. Þannig tengir Pósturinn Ísland við 193 lönd í heiminum og um 200 póstnúmer á Íslandi sem gerir þjónustuna að mikilvægri grunnstoð. Skilyrði fyrir alþjónustu er að öllum landsmönnum skuli standa til boða ákveðin lágmarksþjónusta á viðráðanlegu verði og að uppfylltum ströngum gæðaviðmiðum.
„Aðgengi að viðeigandi póstþjónustu er afar mikilvægur þjónustuþáttur fyrir íbúa landsins og styður við meginmarkmið byggðaáætlunar um blómlegar byggðir og öfluga byggðakjarna sem stuðla að jöfnu aðgengi að grunnþjónustu sem póstþjónustan er,” segir Þórhildur Ólöf Helgadóttir, forstjóri Íslandspósts í tilkynningu.
„Póstþjónusta er einnig mikilvægt byggðamál sem verður að nálgast út frá hagsmunum þeirra sem þjónustunnar njóta og styður við búsetufrelsi fólksins í landinu.”
Undir alþjónustu fellur öll bréfaumsýsla upp að 2 kg og pakkaumsýsla upp að 10 kg innanlands og 20 kg erlendis frá. Tryggja ber þjónustu sem allir notendur póstþjónustu á Íslandi eiga rétt á, sem uppfyllir alþjóðlegar gæðakröfur og er á viðráðanlegu verði.
Heildargreiðsla vegna þjónustu Póstsins nemur nú 618.012.600 kr. sbr. ákvörðun Byggðastofnunar nr. Á-1/2025. Um 84% af endurgjaldinu er á svokölluðum landpóstaleiðum sem eru um 7% af heimilum og fyrirtækjum landsins. Um 16% af endurgjaldinu koma í meginatriðum frá dreifingu bréfa utan stórhöfuðborgarsvæðis og blindrasendingum. Af tekjum Íslandspósts árið 2024 voru 92% tekna frá kaupendum þjónustu og 8% vegna endurgjalds ríkisins.
