Heimir Már er í hópi reynslumestu fréttamanna landsins og er kunnuglegt andlit á skjám landsmanna eftir farsælan feril á fréttastofu Stöðvar 2, Vísis og Bylgjunnar.
Í staksteinum er viðtal sem Heimir veitti mbl.is á dögunum, eftir að tilkynnt var um ráðningu hans, rifjað upp en í því sagðist hann ekki hafa komið „nálægt almennu stjórnmálavafstri“ síðan hann hætti hjá Alþýðubandalaginu, hvar hann var framkvæmdastjóri um tíma, eða til ársins 1999.
„Þarna brestur Heimi Má minni – eða vill gleyma, sem væri skiljanlegt – en hann tók þátt í prófkjöri Samfylkingarinnar árið 2003 og var í framboði fyrir flokkinn það ár líkt og árið 1999,“ segir staksteinahöfundur Morgunblaðsins og heldur áfram:
„Það sem meira er, og ætti að vera enn erfiðara að gleyma, er að hann bauð sig fram til varaformanns í Samfylkingunni árið 2005, en hafði ekki erindi sem erfiði. Þetta ekki-„stjórnmálavafstur“ Heimis Más á árunum 1999 til 2005, og jafnvel lengur ef grannt væri gáð, skilaði ekki miklum afrakstri en nú gengur hann sem sagt í endurnýjun lífdaga og á mikla möguleika í nýjum félagsskap,” segir enn fremur og endar pistillinn á þessu skoti:
„Hann hefur raunar þegar hafið störf með því að útskýra fyrir almenningi að ekkert hafi verið að fjármálum Flokks fólksins. Með slíka öndvegisbyrjun er næsta víst að hann og Inga Sæland munu eiga góða daga saman í gefandi og uppbyggilegu samstarfi.“
Eins og DV greindi frá í gær var eitt af fyrstu verkum Heimis Más sem framkvæmdastjóri Flokks fólksins að gagnrýna fréttaflutning Morgunblaðsins af hinu svokallaða styrkjamáli sem varðaði einmitt Flokk fólksins og raunar fleiri flokka.
Í grein sem hann skrifaði á Vísi um helgina sagði hann að eftir að Flokkur fólksins fór í samstarf með Viðreisn og Samfylkingu eftir kosningarnar í lok nóvember hafi „eiturpennar á Mogganum án alls siðgæðis sem einkennir góða blaðamennsku“ farið á stjá. Má segja að Morgunblaðið sé í dag að svara fyrir þessa gagnrýni Heimis um liðna helgi.
