Þórunn Sveinbjarnardóttir forseti Alþingis baðst afsökunar á þingfundi rétt í þessu. Var afsökunarbeiðnin tilkomin vegna þess að það heyrðist til hennar í þinghúsinu síðasta föstudag kalla þingmenn stjórnarandstöðunnar: „Djöfulsins, helvítis, andskotans pakk.“ Hafði hún áður beðist afsökunar í fjölmiðlum em þingflokksformenn stjórnarandstöðunnar kröfðust þess að Þórunn bæðist afsökunar í þingsalnum sjálfum.
Í upphafi þingfundar kváðu þingflokksformennirnir sér hljóðs um fundarstjórn forseta.
Ingibjörg Isaksen frá Framsóknarflokknum sagðist hafa vonast eftir afsökunarbeiðni úr stóli forseta og spurði Þórunni hvort hún ætlaði ekki að biðjast afsökunar.
Ólafur Adolfsson þingflokksformaður Sjálfstæðisflokksins var eilítið hvassari. Hann vísaði í orð Þórunnar frá því síðasta haust um að hún yrði að endurvinna traust margra þingmanna eftir að hún stöðvaði umræður um veiðigjaldafrumvarp fjármálaráðherra:
„Það eru ótrúleg vonbrigði að forseti skuli ekki hafa stigið hér fram í upphafi þingfundar og beðist afsökunar á þeim orðum sem féllu hér síðastliðinn föstudag. Það bíða allir þingmenn hér í salnum eftir því að forseti stigi nú upp og biðjist afsökunar á orðum sínum.“
Sigríður Á. Andersen þingflokksformaður Miðflokksins tók undir þetta:
„Það er í nokkurri forundran að ég kem hér upp í ræðustól, þriðji þingflokksformaður stjórnarandstöðunnar sem kem hér upp eftir að forseta virðulegum hefur gefist tækifæri í tvígang til þess að ávarpa þingmenn vegna afar óviðurkvæmilegra orða sem að féllu hér í þingsal …. Ég minnist þess ekki að forseti Alþingis hafi látið slík ummæli falla eða eitthvað sambærilegt í garð samþingmanna hvort sem þeir eru í stjórnarmeirihlutanum eða stjórnarandstöðu. Þessi hegðun og ekki síst viðbrögðin í kjölfarið eru ekki til þess fallin að auka hér á samstarf og greiða fyrir afgreiðslu mála hér á þingi það hlýtur öllum að vera ljóst.“
Eftir að Sigríður lauk máli sínu tók Þórunn til máls úr stóli þingforseta:
„Forseti þakkar háttvirtum þingflokksformönnum að taka málið hér upp á þingi og er ljúft og skylt að biðjast afsökunar á þeim orðum sem féllu hér á ganginum á föstudaginn var. Þau féllu í miklum hugaræsingi og ég biðst innilega afsökunar á því og ég bið háttvirta þingmenn alla afsökunar á þeim orðum sem að hér féllu og vonast sannarlega til að ekkert slíkt hendi mig aftur hér í þingsal og ég bið þess að háttvirtir þingmenn taki afsökunarbeiðnina gilda. Hún er einlæg. Það hefur enginn verið jafn miður sín yfir því sem gerðist hér á föstudaginn og sú sem hér stendur og hér með er sú afsökunarbeiðni sem reyndar hefur komið fram annars staðar ítrekuð og ég biðst afsökunar á þeim ummælum sem hér féllu, einlæglega.“
