Dánarorsök Robs og Michele Reiner hefur nú verið opinberlega staðfest, en eins og kunnugt er fundust hjónin látin á heimili sínu í Los Angeles á sunnudag. Sonur þeirra, Nick, er í haldi lögreglu og bendir allt til þess að hann hafi myrt foreldra sína.

Embætti réttarmeinafræðings Los Angeles-sýslu hefur nú greint frá því að banamein hjónanna hafi verið „fjölmargir stunguáverkar af völdum beitts áhalds“.

Samkvæmt opinberum gögnum létust hjónin á sunnudag, sama dag og þau fundust látin í glæsihýsi þeirra. Hafa bæði dauðsföllin verið úrskurðuð manndráp og eru lík þeirra tilbúin til afhendingar aðstandendum. Ekki liggur fyrir hvenær þau verða lögð til hinstu hvílu.

Nick hefur verið ákærður fyrir morðin og verði hann sakfelldur á hann yfir höfði sér lífstíðarfangelsi án möguleika á reynslulausn eða dauðarefsingu. Hann situr nú í gæsluvarðhaldi og verður mál hans næst tekið fyrir þann 7. janúar.

Hann mætti fyrir dómara í gær og í kjölfarið sendu hin börn hjónanna, Romy og Jake, frá sér hjartnæma yfirlýsingu vegna andláts foreldra sinna.

„Orð duga skammt til að lýsa þeim ólýsanlega sársauka sem við finnum fyrir,“ sögðu þau meðal annars.

Rob Reiner fæddist í New York árið 1947 og átti hann mjög svo farsælan feril sem leikari, leikstjóri og handritshöfundur.

Hann leikstýrði myndunum This is Spinal Tap, Stand by Me, The Princess Bride, When Harry Met Sally, Misery og A Few Good Men svo einhverjar séu nefndar. Var hann tilnefndur til Óskarsverðlauna fyrir A Few Good Men. Þá lék hann einnig talsvert, bæði í kvikmyndum og sjónvarpsþáttum.