Lítill vinskapur er á milli Bandaríkjanna og Venesúela, en Bandaríkjamenn hafa aukið viðbúnað sinn undan ströndum landsins undanfarnar vikur. Hefur orðrómur verið á kreiki um að Trump gæti hugsað sér að ráðast inn í landið og koma Maduro frá völdum með góðu eða illu.
Miami Herald hefur eftir heimildarmanni sínum að Bandaríkjastjórn hafi rætt við stjórnvöld í Caracas í gegnum síma á föstudag þar sem fyrrnefndir afarkostir voru settir fram.
Segir heimildarmaður Miami Herald að samtalið hafi fljótt farið í öngstræti þar sem ljóst var að afstaða Bandaríkjanna annars vegar og Venesúela hins vegar var mjög ólík.
Eru yfirvöld í Washington sögð hafa lagt áherslu á að Maduro, eiginkona hans og sonur, gætu yfirgefið landið á „öruggan hátt“ ef hann myndi stíga tafarlaust til hliðar.
Heimildarmaður sem þekkir til samtalsins segir að Maduro hafi beðið Trump um alþjóðlega sakaruppgjöf sem Trump hafnaði. Í kjölfarið hafi Maduro óskað eftir því að fá að halda stjórn á her Venesúela gegn því að boða til frjálsra kosninga. Þessari hugmynd er Trump einnig sagður hafa hafnað.
Um ellefu bandarísk herskip eru nú á hafsvæði skammt frá ströndum Venesúela en í þeim eru 15 þúsund hermenn. Hefur Bandaríkjaher gert árásir á meinta fíkniefnasmyglara frá Venesúela undanfarnar vikur, en talið er að um 80 manns hafi látist í þeim árásum.
