Ragnhildur Þórðardóttir sálfræðingur, Ragga nagli, segir Neyðarkall Slysavarnafélagsins Landsbjargar endurspegla fjölbreytileika samfélagsins. Segir hún þá sem setja út á kallinn í ár mega skammast sín.

DV greindi frá því í gær að 19 ára félagi í björgunarsveit hefði komið miður sín heim eftir niðrandi athugasemdir um Neyðarkallinn í ár.

Sjá einnig: 19 ára sjálfboðaliði kom miður sín heim eftir sölu á Neyðarkallinum: „Hver eru skilaboðin frá þessu aumkunarverða fólki til næstu kynslóðar?“

Í færslu á Facebook-síðu sinni segist Ragga alltaf hafa keypt Neyðarkallinn. Í ár var engin undantekning, enda 3500 krónur gjöf en ekki gjald segir Ragga til að styðja hið mikilvæga og óeigingjarna starf félagsins.

„Enda vitum við aldrei hvenær við þurfum á þeim að halda. Í anddyri matvöruverslunar hitti Naglinn indælan og glaðan sölumann Neyðarkallsins.“

Segist Ragga hafa keypt kall af honum um leið.

„Þegar pakkningin var tekin af kom í ljós að í ár er þessi dúllukall brúnn á hörund, og bros færðist yfir andlitið og fyrsta hugsun var hversu tímabært og mikilvægt að hann endurspegli fjölbreytileika samfélagsins. Því Íslendingar eru ekki bara arískir og hvítir á hörund með ljósar krullur og blá augu. Við erum ekki búin til í petrídisk í seinni heimsstyrjöldinni.

Íslendingar eru allskonar á litinn með margvíslegan uppruna.

Naglinn mun kaupa Neyðarkallinn hvort sem hann er svartur, brúnn, gulur, samkynhneigður, trans, karl, kona, berrassaður eða í sundbol.“

Ragga segir það sorglegra en tárum taki að lesa að þarna úti sé

„virkilega mannskepnur sem ganga meðal vor og krulla efri vörina yfir húðlit Neyðarkallsins er sorglegra en tárum taki.

Þetta fólk er að mati Naglans siðferðislega gjaldþrota með sjóndeildarhring þrengri en nálarauga.

Slíkar skoðanir um húðlit og uppruna áttu einungis heima í teboði hjá Göbbels og Mengele.

Ekki í fjölmenningarsamfélögum samtímans þar sem við fögnum fjölbreytileika mannflórunnar. Skammist ykkar!!“