„Ég bjóst alls ekki við þessu,“ segir viðkomandi sem af innlegginu að dæma var staddur á Akureyri þegar hann lenti í þessu leiðinlega atviki. Óvíst er þó hvort hann hafi dvalið á hóteli eða í heimagistingu eins og Airbnb.
„Sá sem seldi mér gistinguna samþykkti að veita mér endurgreiðslu en mér finnst það bara ekki vera nóg. Það eru liðnir sex dagar síðan þetta gerðist og ég er enn með útbrot og kláða út um allan líkamann,“ segir ferðamaðurinn sem segist hafa upplifað sársauka og svefnlausar nætur eftir þetta.
„Svo ekki sé minnst á það að þetta er búið að eyðileggja ferðina fyrir mér.“
Viðkomandi leitar ráða hjá fólki og tekur fram að hann hafi bæði myndir og myndbönd sem sýna veggjalúsina á dvalarstaðnum. „Hver ættu mín næstu skref að vera? Get ég beðið um bætur fyrir óþægindin sem þetta hefur valdið mér?“
Margir leggja orð í belg við færsluna og segir einn að það sé kannski ekkert svo óvænt að vera bitinn af veggjalús á Íslandi.
„Það er haugur af ferðamönnum á Íslandi sem koma frá öllum heimshornum og óhjákvæmilega geta einhverjir þeirra borið með sér veggjalús. Það er gott að þú fékkst endurgreitt en ég veit ekki hvaða bætur þú getur farið fram á. En passaðu bara vel að þvo fötin þín og skoða farangurinn þinn vel svo þessi ófögnuður fylgi þér ekki eitthvað annað,“ segir í færslu viðkomandi.
Annar tekur undir þessi orð og segir að túrisma fylgi veggjalýs, hvort sem fólki líkar betur eða verr. Á Íslandi gisti fólk að jafnaði ekki fleiri en 1-2 nætur á sama staðnum og tölfræðilega séu því ágætis líkur á að þær finnist hér á landi, að minnsta kosti miðað við dvalarstaði í sólarlöndum þar sem fólk gistir á sama hótelinu í 1-2 vikur í senn.
„Ég myndi búast við endurgreiðslu en ég myndi ekki búast við að fá neitt meira. Þetta bítur, bókstaflega en ég mæli með að þú kynnir þér hvernig þú getur athugað hvort veggjalýs séu í herberginu áður en þú leggst til svefns.“
Á Vísindavefnum má finna allskonar fróðleik um veggjalýs en þar kemur fram að hún sé talin upprunnin í Asíu og hafi fylgt manninum frá örófi alda. Hún hefur fundist í byggð hér á landi í öllum landshlutum.
„Hér á landi lifir veggjalús eingöngu í upphituðu þurru húsnæði. Hún nærist alfarið á blóði sem hún sýgur úr fórnarlömbum sínum sem oftar en ekki eru mannfólkið. Þegar hungur sverfur að skríða lýsnar fram úr fylgsnum sínum sem oftast eru í námunda við svefnstaði, í sprungum og glufum í tréverki, niður með rúmdýnum, í fellingum með saumum, undir gólflistum, í rafmagnsdósum, á bak við myndir og annað sem hangir á veggjum, laust veggfóður eða glufóttan panel; í stuttu máli hvarvetna þar sem felustaði er að finna.“
