Eigendur staðarins tilkynntu þetta í færslu á Facebook í gærkvöldi og er óhætt að segja að margir komi til með að sakna kaffihússins ef marka má athugasemdir við færsluna.
Það voru hjónin Birgir Finnbogason og Hrafnhildur Blomsterberg sem stofnuðu Súfistann árið 1994 og hefur hann verið rekinn af þeim og fjölskyldu þeirra frá upphafi. Í færslunni er bent á að staðurinn hafi fagnað 30 ára afmæli sínu í sumar og hann hafi alla tíð verið staðsettur í einu elsta steinhúsi Hafnarfjarðar að Strandgötu 9.
En nú er komið að leiðarlokum í rekstri Súfistans og ætlar fjölskyldan að snúa sér að öðrum verkefnum.
„Súfistinn lokar því dyrum sínum fyrir viðskipti fyrir fullt og allt í lok dags föstudaginn 17. janúar eftir 30 ára ævintýri,” segir í færslunni og bent á að á laugardag verði opið hús fyrir alla viðskiptavini Súfistans milli kl. 13:00 og 18:00 þar sem heitt verður á könnunni og viðskiptavinir geta hist, kvatt staðinn, eigendur og starfsfólk.
Segir í færslunni að fjölskyldan gangi stolt frá þessu 30 ára starfi okkar og þakkar fyrir allar góðar samverustundir.
Sem fyrr segir kveðja margir staðinn með söknuði og segir fjölmiðlamaðurinn Egill Helgason til dæmis á Facebook-síðu sinni:
„Ég hef átt margar góðar stundir á Súfistanum í Hafnarfirði. Stundum þegar ég er að sýsla eitthvað í bænum eða vegna þess að ég fer barasta í bíltúr þangað – einhvern veginn hef ég alltaf dregist dálítið að Hafnarfirði. Strandgatan missir mikið við brotthvarf Súfistans. Góður staður, gott kaffi og gott að sitja þar fyrir utan á góðviðrisdögum. Eiginlega hjarta bæjarins. Ég þakka fyrir mig.”
