Ökumenn sem sprengdu dekk eða skemmdu bíla sína við það að keyra ofan í djúpar holur sem mynduðust í þíðunni um helgina á höfuðborgarsvæðinu fá að öllum líkindum ekki bætur frá Vegagerðinni vegna tjónsins. Ástæðan er sú að Vegagerðin brást, að öllum líkindum, nægilega fljótt við tilkynningum um holurnar en miðað er við að viðbragðstíminn sé innan fjögurra klukkustunda frá fyrstu tilkynningu.
Þetta kemur fram í frétt sem birtist á heimasíðu Vegagerðarinnar seinnipartinn í dag í kjölfar fyrirspurnar DV.
DV greindi frá því á mánudaginn að fjölmargir ökumenn hefðu lent í því um helgina að sprengja dekk á bílum sínum eða jafnvel skemma þá enn frekar við að keyra ofan í áðurnefndar holur á að minnsta kosti þremur stöðum á höfuðborgarsvæðinu. Að minnsta kosti 21 bílar urðu fyrir slíku tjóni samkvæmt tilkynningu frá lögregunni í byrjun vikunnar.
Ein af þessum holum myndaðist á hringtorgi á Vesturlandsvegi þar sem keyrt er inn í Helgafellsland í Mosfellsbæ. Þar urðu líklega á annan tug bifreiða fyrir ýmis konar tjóni og bar á því ökumenn lýstu yfir óánægju sinni með að Vegagerðin hafði ekki brugðist fyrr við tilkynningum um hættuna.
Fyrsta tilkynningin er sögð hafa borist um kl. 16 en Vegagerðin mætti á staðinn til að lagfæra holuna tveimur klukkustundum síðar.
Eins og áður segir er nægilegur viðbragðstími samkvæmt Vegagerðinni fjórar klukkustundir en starfsmenn stofnunarinnar reyna þó að sjálfsögðu að bregðast hraðar við ef kostur er.
Allar líkur eru því að ökumenn muni ekki eiga rétt á bótum fráVegagerðinni vegna tjóns sem þeir urðu fyrir en þurfi þess í stað að leita til tryggingafélaga sinna.
