Gjaldþrot Play hefur vakið heimsathygli. Erlendir miðlar hafa í dag fjallað um málið og greint frá því að gjaldþrotið hafi komið farþegum að óvörum sem og fleirum enda hafi flugfélagið látið að því liggja undanfarið að allt væri með felldu þó að áskoranir væru til staðar.

„Íslenskt lággjaldaflugfélag riðar skyndilega til falls, skilur farþega eftir strandaða,“ segir í fyrirsögn fréttar The New York Times.

„Annað lággjaldaflugfélag farið fyrir bí – hér er það sem þið þurfið að vita um flugin ykkar,“ segir í fyrirsögn Independent.

„Þetta evrópska flugfélag hætti starfsemi og aflýsti flugum í vikunni,“ segir hjá USA Today. 

Eins hafa allir helstu flugmiðlar greint frá gjaldþrotinu. Í athugasemdum miðlanna má sjá útlendinga hæðast af meintri vangetu Íslendinga til að reka lággjaldaflugfélag og muna greinilega margir enn vel eftir falli WOWair árið 2019. Til dæmis er skrifað við frétt The New York Times á Facebook:

„Klassísk Íslendingahegðun. Hvílík klisja.“ 

„Þetta minnir á WOWair“ 

„Ekki í fyrsta sinn og ekki í seinasta“ 

„Play fylgir leikbók Wow. 0-2 fyrir íslensk flugfélög.“ 

Jón Þór Þorvaldsson, formaður íslenskra atvinnuflugmanna, spáði því snemma í þessum mánuði að Play væri á leiðinni í þrot. Vísir greinir nú frá því að Play hafi leitað til Samkeppniseftirlitsins vegna ummæla Jóns Þórs, hann er flugmaður hjá Icelandair og með „dylgjum“ sínum hafi hann grafið undan trausti til Play. Taldi Play að þarna hafi Icelandair verið að misnota markaðsráðandi stöðu sína.

Í tilkynningu Play til Kauphallarinnar í morgun, um yfirvofandi gjaldþrot, var meðal annars tekið fram að reksturinn hefði verið þungur vegna lélegrar sölu flugmiða og svo vegna neikvæðrar umfjöllunar um reksturinn.