Snorri er í dag þingmaður Miðflokksins eins og kunnugt er en fátt hefur verið meira rætt undanfarinn sólarhring en umdeilt viðtal í Kastljósi í fyrrakvöld þar sem hann og Þorbjörg Þorvaldsdóttir, verkefnastýra Samtakanna 78, tókust á um hinsegin málefni.
„Snorri Másson tók þetta viðtal við mig 5. ágúst 2022 þegar ég var að undirbúa trukkinn fyrir Gleðigönguna. Hann veit betur,” segir Páll Óskar meðal annars í færslunni og bætir við:
„Ég styð trans fólk og kynsegin fólk, baráttu þeirra sem og allra hinna systkina minna í hinsegin fjölskyldunni. Kynin eru fleiri en tvö, litrófið er risastórt og fjölbreytt og bakslagið er raunverulegt,“ segir hann.
„Mig langar að þakka Snorra kærlega fyrir að þétta raðir okkar Hinsegin fólks og bandamanna okkar, í baráttu okkar gegn hatursorðræðu og fyrir sjálfsögðum mannréttindum. Ég hef sjaldan fundið fyrir eins miklum SAMTAKA(78)MÆTTI og ákkurat í dag. Áfram gakk!“
Í viðtalinu fyrir þremur árum kom Páll Óskar einmitt inn á það að bakslag hefði átt sér stað.
„Við verðum stöðugt að vera á vaktinni með akkúrat þennan boðskap vegna þess að akkúrat núna þá er bakslag í gangi, við finnum fyrir því á eigin skinni. Og ég er að sjá það sjálfur, einkum og sér í lagi á samfélagsmiðlum, að trans fólk og kynsegin fólk er núna að fá á sig nákvæmlega sama munnsöfnuð og ég fékk á mig fyrir 30 árum síðan.“
Færsluna og viðtalið má sjá hér að neðan.
