Hönnun hins nýja landspítala fellur ekki í kramið hjá blaðamanninum og rithöfundinum Illuga Jökulssyni. Margir eru sammála honum um útlitið.

„Ég kann vel við margt í nútímaarkitektúr. En þetta er ekki fallegt,“ segir Illugi í færslu á samfélagsmiðlum.

Fjölmargir taka undir með honum, þar á meðal Egill Helgason fjölmiðlamaður og samfélagsrýnir. „Ónei,“ segir hann.

Bent er á að byggingin liggi illa í landslaginu og skyggi á gamla landspítalann, sem sé ein fallegasta spítalabygging landsins.

„Íslenskur byggingastíll er heilt yfir forljótur. Allt kassalaga og einsleitt, svart og grátt,“ segir einn í athugasemd. Annar segir að því miður sé nýi landspítalinn birtingarmynd margra nýbygginga í miðbæ Reykjavíkur.

„Arkitektar eru stéttin sem auðveldast væri að skipta út fyrir AI. Teikna hvort eð er bara ljóta kassa,“ segir einn.

Ekki eru þó allir sammála um ljótleika hins nýja sjúkrahúss. Sara Oskarsson, fyrrverandi varaþingmaður Pírata, kemur byggingunni til varnar.

„Persónulega skil ég ekki ósætti fólks við þessar byggingar. Þær eru í mínum augum í takti við tíðarandann, nýstárlegar, ferskar og munu vera functional þegar að þar að kemur,“ segir hún. „Það er heldur ekki gott að byggingarstíll festist í fortíðinni og rembist af fortíðarþrá sem skilar af sér hálf óstarfhæfar vistarverur.“