Sérfræðingur í hugverkarétti telur afar líklegt að Skógræktarfélag Eyjafjarðar hafi brotið gegn höfundarrétti með því að útbúa sérstakan múmínlund í Kjarnaskógi við Akureyri.
Þetta kemur fram í frétt RÚV.
Frétt DV um málið á föstudag hefur vakið mikla athygli:
Þar segir að sérstakur Múmínlundur sem útbúinn hefur verið í Kjarnaskógi við Akureyri af hálfu Skógræktarfélags Eyjafjarðar með styrk frá Akureyrarbæ sé höfundarréttarbrot að mati rétthafa Múmínálfanna sem hyggjast lögsækja Skógræktarfélag Eyjafjarðar.
Í svari frá forstjóra rétthafa Múmínálfanna, finnska fyrirtækisins Moomin Characters, við fyrirspurn DV, segir:
„Þetta er því miður blygðunarlaust höfundarréttarbrot gagnvart Moomin Characters. Lögmenn okkar eru í þessum skrifuðu orðum að undirbúa lögsókn á hendur hinum brotlegu.“
„Þú mátt leika þér með leikföngin og þú mátt bjóða í kaffiboð með múmínbollanum sem þú átt en um leið og þú ert farinn að gera eitthvað opinberlega fyrir almenning, mögulega í fjárhagslegum tilgangi, þá ertu komin á hættusvæði,“ segir Ásdís Magnúsdóttir, lögmaður og sérfræðingur í hugverkarétti, í viðtali við RÚV.
Ásdís telur líklegt að mat Moomin Characters, um að hér eigi sér stað blygðunarlaust höfundarréttarbrot, sé rétt:
„Mér finnst það mjög líklegt já. Það er einhver ástæða fyrir því þegar þú setur upp nýjan skemmtilegan garð í skógi fyrir börn að þú ákveður akkúrat að gera þetta ævintýri. Það er af því að þetta ævintýri er mjög heillandi, mjög vinsælt og það er skapað af ákveðinni persónu sem á þá réttinn til þess ævintýris.“
Hún bendir einnig á að notkun á Múmínálfunum snúist einnig um sæmdarrétt:
„Þú vilt svolítið hafa stjórn á hvernig verkin þín eru notuð. Það er ekkert að ástæðulausu að ævintýri eins og Múmínálfarnir er jafnt vinsælt og raun ber vitni. Þeim er mjög annt um þetta og þeim er ekki sama hvernig tilvísanir í ævintýrið eru notaðar.“
