Öryrkjabandalag Íslands (ÖBÍ) hefur sent frá sér yfirlýsingu vegna máls unga öryrkjans Jakubs Polkowski sem er að leita réttar síns gegn útgerðarfélaginu Sæstjörnunni, Reykjanesbæ og íslenska ríkinu eftir að hús hans var selt nauðungarsölu árið 2023. Nauðungarsalan fór fram vegna þess að Jakub, sem átti húsið skuldlaust, hafði ekki staðið skil á opinberum gjöldum en ungi öryrkinn hefur borið því við að hafa ekki áttað sig á því að hann þyrfti að greiða slík gjöld. Húsið var selt Sæstjörnunni á uppboði fyrir aðeins 3 milljónir, en vanskil Jakubs námu aðeins 2,5 milljónum. Sæstjarnan hefur nú selt húsið fyrir 78 milljónir og græddi því 75 milljónir á sölunni á meðan Jakub sat eftir heimilislaus með sárt ennið.
Húsið hafði Jakup keypt fyrir bætur sem hann fékk vegna læknamistaka sem urðu til þess að hann hlaut heilaskaða og varanlega örorku aðeins 13 ára gamall. Hann hafði áður verið heilbrigður unglingur sem hafði áhuga á íþróttum en eftir mistökin þurfti hann að horfast í augu við að þurfa að notast við hjólastól út ævina.
Jakub hefur stefnt Sæstjörnunni, Reykjanesbæ og íslenska ríkinu út af nauðungarsölunni og fer fram á greiðslu 58 milljóna króna. Sæstjarnan hefur farið fram á að Jakub leggi fram málskostnaðartryggingu í málin og bæði héraðsdómur og Landsréttur hafa fallist á að gera Jakub að greiða 1,1 milljón í málskostnaðartryggingu svo hann geti haldið máli sínu til streitu. Jakub óskaði eftir því að fá að áfrýja úrskurðinum til Hæstaréttar en Hæstiréttur hefur hafnað kæruleyfisumsókn.
ÖBÍ lýsir „megnri óánægju og hneykslan“ með ákvörðun Hæstaréttar og ætlar að greiða málskostnaðartrygginguna svo Jakub geti leitað réttar síns.
„Málið allt er sorglegt dæmi um það hvernig íslenskt réttarkerfi gerir ekki ráð fyrir fötluðu fólki, gætir ekki að hagsmunum þess og veitir ekkert svigrúm til þess að fatlað fólk geti fengið úrlausn um réttindi sín. Málið sýnir fram á mikilvægi þess að lögfesta Samning SÞ um réttindi fatlaðs fólks svo að fatlað fólk eigi raunhæfa möguleika á þátttöku í íslensku samfélagi til jafns við aðra.
ÖBÍ réttindasamtök munu greiða málskostnaðartrygginguna fyrir hönd Jakubs. ÖBÍ styður málsókn Jakubs heils hugar.“
