Landsréttur hefur þyngt fangelsisdóm héraðsdóms yfir Ásgeir Þór Önnusyni vegna skotárásar inni á heimili fjölskyldu á Hvaleyrarholti í Hafnarfirði á aðfangadagskvöld árið 2023.
Ásgeir Þór var ákærður og sakfelldur fyrir tilraun til manndráps, húsbrot, hættubrot og vopnalagabrot með því að hafa ásamt öðrum manni ruðst grímuklæddur inn á heimili fjölskyldu á Hvaleyrarholti í Hafnarfirði á aðfangadagskvöld árið 2023. Skaut hann þar án viðvörunar samtals sex skotum úr skammbyssu að níu ára stúlkubarni og föður hennar en faðirinn skýldi barninu á meðan skothríðinni stóð. Fjögur skot höfnuðu á vegg hægra megin við inngang herbergisins þar sem þau breyttu um stefnu inn í stofuna þannig að ákoma myndaðist á glerplötu sófaborðs og innra byrði rúðu brotnaði. Eitt skot fór í gegnum hægri hurðarstaf og inn í svefnherbergi barnsins þar sem það endaði á milli miðstöðvarofns og gluggakistu.
Ásgeir hlaut fimm ára fangelsi í héraðsdómi fyrir glæpinn en Landsréttur þyngir dóminn í sex ára fangelsi.
Landsréttur staðfestir dóma yfir tveimur öðrum sakborningum í málinu, þeim Breka Þór Frímannssyni og Hilmi Gauta Bjarnasyni. Breki Þór var dæmdur fyrir hlutdeild í brotum Ásgeirs Þórs með því að hafa liðsinnt honum við undirbúning og framkvæmd brotsins, meðal annars með því að greiða Hilmi Gauta Bjarnasyni 80 þúsund krónur fyrir að taka þeim á vettvang, auk þess að ryðjast grímuklæddur með Breka Þór inn í íbúðina. Hilmir Gauti var sakfelldur fyrir hlutdeild í brotinu með því að aka tvímenningunum gegn greiðslu.
Breki Þór fékk 30 mánaða fangelsi og Hilmir Gauti eins árs skilorðsbundið fangelsi.
Landsréttur vísaði hins vegar frá dómi þeim hluta ákærunnar sem tekur til húsbrots og teljast sakborningarnir ekki lengur sekir um það.
Dóminn má lesa hér.
