Guðmundur Kristjánsson, aðaleigandi útgerðarfélagsins Brims, hefur lengi borið viðurnefnið Guðmundur vinalausi. En kannski vita fáir hvernig það er tilkomið.
Guðmundur segist hafa fengið viðurnefnið árið 2004 þegar hann keypti Útgerðarfélag Akureyringa, ÚA.
„Þegar ég keypti ÚA af Landsbankanum af fyrirtæki í Reykjavík. Akureyringarnir voru löngu búnir að selja þetta. Og þá átti KEA og spekingar á Akureyri áttu að kaupa ÚA. Og KEA bauð sjö til átta og hálfan milljarð frávikstilboð. Ég bauð níu milljarða og það var þannig að Sigurjón hringir í mig að morgni dags og segir: „Er þér alvara að kaupa þetta?“
Segir Guðmundur í viðtali í hlaðvarpsþættinum Chess After Dark.
„Ég segi já, en ég á engan pening, þú verður að lána mér. Það er ekkert mál. Og svo segir hann: „Hvenær ertu klár að koma?“ Ég sagði: „Eigum við ekki bara að klára þetta í dag?“
Jú, geturðu komið klukkan fjögur? Og við kláruðum allt fyrir miðnætti.“
Guðmundur segist hafa gleymt að hringja og láta nokkra félaga sína, áhrifafólk á Akureyri, vita.
„Svo bara á miðvikudagsmorguninn þá er bara tilkynnt af því að Eimskip var á markaði, það er búið að selja ÚA og þá var maður sem var bæjarstjóri á Akureyri og tekinn í viðtal, Kristján Þór. Hann var alveg foxillur í útvarpinu og svo hafa þeir örugglega skammað KEA-mennina svo mikið að framkvæmdastjóri KEA, hann fór í paník og hann segir bara: Já, þetta er bara vinalaus maður, hann er bara vinalaus. Hann mun eyðileggja allt hérna á Akureyri.“ Þannig byrjaði þetta bara.“
ÚA rann síðar inn í Brim.
