Trump fundaði í gær með þjóðaröryggisráði Bandaríkjanna í Hvíta húsinu og herma heimildir ABC að niðurstaðan þar hafi verið á þá leið að næstu 24 til 48 klukkutímarnir geti ráðið úrslitum um hvort diplómatísk lausn sé möguleg. Ef ekki gæti Bandaríkjaforseti ákveðið að ráðast á Íran.
Fyrir fundinn í gær kallaði Trump eftir uppgjöf Írans og sagði að Bandaríkin vissu nákvæmlega hvar Ayatollah Ali Khamenei, æðsti klerkur Írans, væri og þeir gætu hæglega tekið hann úr umferð – eða drepið hann.
Í frétt ABC kemur fram að þrátt fyrir orðræðu sem gefur til kynna hernaðarhótanir telji bandarískir samningamenn að Íran sé í veikri stöðu og gæti neyðst til að setjast að samningaborðinu og samþykkja samkomulag sem myndi fela í sér að landið hverfi alveg frá kjarnorkuáætlun sinni.
Átök Írans og Ísraels halda áfram en íranska stjórnin er sögð hafa gefið merki um vilja til að hefja aftur viðræður við Bandaríkin. Bættu heimildarmenn við að ríkisstjórn Trumps hefði krafist skýrari skuldbindinga áður en hún hættir að velta mögulegum hernaðaraðgerðum fyrir sér.
Sé Íran reiðubúið að koma að samningaborðinu telja heimildarmenn að jafnvel strax í þessari viku verði unnt að koma á fundi þar sem samkomulag næst vonandi. En til að það gerist muni Íran þurfa að bregðast hratt við enda fari þolinmæði Trumps forseta gagnvart ástandinu í Miðausturlöndum þverrandi.
