Hæð á Grænlandshafi stjórnar veðrinu hjá okkur í dag og er áttin því norðaustlæg eða breytileg. Þetta kemur fram í hugleiðingum veðurfræðings á vef Veðurstofu Íslands.

Að sögn veðurfræðings verður víða gola eða kaldi og bjartviðri, en einhver lágský verða þó viðloðandi fram eftir morgni á Norður- og Austurlandi. Hiti yfir daginn frá 7 stigum við norðausturströndina, upp í 18 stig suðvestanlands. Á sjálfvirku spákorti Veðurstofunnar má sjá að hitinn í höfuðborginni gæti farið upp í 17 stig í dag í hægum vindi og sól.

„Svipað veður á morgun, víða hlýtt og bjart og hiti yfirleitt á bilinu 10 til 19 stig. Austantil á landinu þykknar hins vegar upp með lítilsháttar vætu og þar verður líklega mun svalara. Á sunnudag er svo útlit fyrir hæga breytilega átt, smáskúrir á víð og dreif og þokuloft við austurströndina. Heldur kólnandi,“ segir að lokum í hugleiðingum veðurfræðings.

Veðurhorfur á landinu næstu daga

Á laugardag:
Norðaustlæg eða breytileg átt 3-10 m/s. Súld eða dálítil rigning austantil og hiti 4 til 11 stig, en þurrt og bjart á Norður- og Vesturlandi með hita að 18 stigum.

Á sunnudag:
Breytileg átt 3-8, bjart með köflum og líkur á stöku síðdegisskúrum inn til landsins. Skýjað austanlands og sums staðar þokuloft við ströndina. Hiti 7 til 16 stig, hlýjast í innsveitum.

Á mánudag:
Suðlæg eða breytileg átt 5-10 og rigning eða súld með köflum, en þurrt norðaustantil fyrri part dags. Hiti 8 til 15 stig.

Á þriðjudag (lýðveldisdagurinn) og miðvikudag:
Vestlæg eða breytileg átt og væta með köflum. Hiti víða 7 til 13 stig.

Á fimmtudag:
Suðaustlæg átt með rigningu víða um land.