Opnun tveggja kaffihúsa Starbucks í miðborg Reykjavíkur frestast fram í sumarlok en til stóð að opna kaffihúsin í maí. Morgunblaðið greinir frá þessu í dag en ástæðan mun vera seinagangur til leyfisveitingar hjá Reykjavíkurborg.

Morgunblaðið hefur fjallað ítarlega um þetta síðustu daga, meðal annars rúmlega 200 daga bið bakarísins Hygge eftir rekstrarleyfi á Barónstíg. Fleiri rekstraraðilar eru í svipaðri stöðu, til dæmis rekstraraðilar Drunk Rabbit og Kastrup.

„Þetta er ekki frábær staða,“ segir Daníel Kári Stefánsson, framkvæmdastjóri Starbucks á Íslandi, í samtali við Morgunblaðið í dag.

Nefnir hann að sótt hafi verið um úttekt byggingarstjóra um miðjan maí en ekki fáist úttekt fyrr en 26. júní. „Þá get­ur heil­brigðis­eft­ir­litið aug­lýst. Við fáum því kannski rekstr­ar­leyfi í ág­úst,“ seg­ir hann.

Hann gerir ekki athugasemd við að fólki gefist tækifæri til að koma á framfæri athugasemdum ef opna á kaffihús eða veitingastaði á stöðum þar sem slík starfsemi hefur ekki verið áður. „Okkar staður er á Hafnartorgi, inni í mathöll. Það er aðeins öðruvísi,“ segir hann við Morgunblaðið í dag þar sem nánar er fjallað um málið.