Slóvenar vilja rannsókn á símakosningunni í Eurovision og gruna Ísraela um að hafa beitt þar bellibrögðum. Þeir segjast einnig íhuga að hætta í Eurovision.

Slóvenar bætast í hóp með Íslandi, Noregi, Spáni, Írlandi og Finnlandi sem vilja láta rannsaka símakosningu Eurovision. Þetta kemur fram í tilkynningu frá sjónvarpsstöðinni Television Slovenia og bréfi sem sent var til skipuleggjandans EBU.

„Sem framkvæmdastjóri Television Slovenia ítreka ég áhyggjur okkar af þátttöku Ísraels í viðburðum á vegum EBU, sérstaklega Eurovision,“ segir í bréfi Ksenja Horvat, framkvæmdastjóra. „Því miður hafa viðbrögðin sem við höfum fengið ekki gefið okkur neinar áreiðanlegar skýringar né hafa þau komið til móts við hið aðkallandi mál sem við erum að bera upp. Í dag hefur mannúðarkrísan á Gaza og hernumdum svæðum í Palestínu versnað og áhyggjur fólks í Slóveníu og um gervalla Evrópu hafa aukist til muna.“

Segir hún að margir áhorfendur keppninnar í Slóveníu hafi efasemdir um trúverðugleika símakosningarinnar og að traust til EBU sé þverrandi. Meðal annars þurfi að rannsaka hvernig atkvæði í símakosningu féllu samanborið við netkosningu.

„Ef EBU tekur ekki ákveðin skref til að koma til móts við áhyggjur okkar þá munum við endurskoða þátttöku okkar í Eurovision,“ segir í bréfinu.