Náttúruverndarstofnun hefur lagt til að friðlandið við Gróttu verði stækkað og friðlýsingin endurskoðuð í samræmi við reglur um náttúruvernd. Meginmarkmiðið er að vernda fuglasvæðið.

Stofnunin leggur fram tillöguna en hún var unnin af samstarfshópi þar sem einnig átu sæti fulltrúar frá Seltjarnarnesbæ, Minjastofnunar og sérfræðingur í málefnum fugla.

„Meginmarkmið með friðlýsingunni er meðal annars að stuðla að vernd líffræðilegrar fjölbreytni, samanber 2. gr. laga nr. 60/2013, með því að vernda alþjóðlega mikilvægt fuglasvæði á Seltjarnarnesi, vistgerðir þess og búsvæði fugla. Vernda skal lífríki í fjöru og á grunnsævi, einkum og sér í lagi með tilliti til fugla, sem og hafsbotninn,“ segir í tilkynningu með tillögunni og frestur gefinn til 7. júlí til að gera athugasemdir.

Eins og sjá má á korti er um umtalsverða stækkun friðlandsins að ræða, einkum í suðurátt. Það er að svæðið nái að ströndinni við Seltjörn og við svæði golfklúbbs Seltjarnarness.

Samkvæmt tillögunni verður öll umferð í eyjuna óheimili á tímabilinu 1. maí til 31. júlí en í dag er umferð óviðkomandi fólks bönnuð 1. maí til 15. júlí. Þá verður umferð vatnatækja, svo sem sjókatta, sjódreka og seglbretta óheimil á sama tímabili.