Þorsteinn Már Baldvinsson, forstjóri Samherja hf., hefur ritað bréf til starfsfólks fyrirtækisins þar sem hann greinir frá ákvörðun sinni um að láta af störfum sem forstjóri félagsins í júní næstkomandi. Mun sonur hans, Baldvin Þorsteinsson, taka við forstjórastarfinu.
Frá þessu er greint á heimasíðu Samherja þar sem bréf hans er birt í heild sinni. Þar segir hann meðal annars:
„Ég hef tekið ákvörðun um að láta af störfum sem forstjóri Samherja hf. eftir að hafa gegnt því starfi í 42 ár eða frá stofnun félagsins árið 1983. Starfslok verða í næsta mánuði. Stjórn Samherja hf. gekk í vikunni frá ráðningu Baldvins Þorsteinssonar í starf forstjóra. Eins og þið vitið er Baldvin einn af stærstu hluthöfum Samherja hf. og hefur verið stjórnarformaður félagsins frá 2023,” segir hann meðal annars.
Í bréfinu segir Þorsteinn Már enn fremur að hann hafi fyrir löngu ákveðið að hætta sem forstjóri á eigin forsendum áður en hann yrði „gamall og leiðinlegur” eins og hann orðar það.
„Eftir rúma fjóra áratugi í svona starfi er eðlilegt að líði að starfslokum. Allt hefur sinn tíma og sjálfum finnst mér þessi tímasetning heppileg,” segir hann.
„Þótt þessi ákvörðun mín marki kaflaskil er ég ekki alveg sestur í helgan stein enda sit ég í stjórnum félaga. Þar má nefna Samherja fiskeldi ehf. og Síldarvinnsluna hf. í Neskaupstað þar sem ég hef verið stjórnarformaður frá 2003.“
