Nítján ára gamall maður var skotinn til bana við flugvöllinn á Cran Canaria á laugardaginn. Lögreglumenn voru þar að verki og segjast hafa neyðst til að skjóta manninn til að koma í veg fyrir að hann skaðaði aðra. Maðurinn ógnaði leigubílstjóra, flugfarþega og lögreglumönnum með hnífi.
Canarian Weekly greinir frá þessu. Áður en lögreglan greip til þessara örþrifaráða hafði maðurinn reynt að stinga leigubílstjóra með hnífi. Leigubílstjórann sakaði ekki en árásarmaðurinn ógnaði þvínæst farþega inni í flugstöðinni með hnífnum.
Fimm lögreglumenn tóku þátt í aðgerðinni. Kom til handalögmála þar sem einn lögreglumaðurinn féll við og skutu þá hinir manninn til að vernda félaga sinn.
Atvikið átti sér stað um kl. 16:45 á laugardaginn.
Vitni á vettvangi segja að hleypt hafi verið af átta til níu skotum. Mikið uppnám hafi orðið í flugstöðinni á meðan átökunum stóð. Maðurinn sem varð fyrir skotum lögregulmannanna lést á vettvangi. Lík hans lá í um þrjár klukkustundir nálægt strætisvagnastöð við flugstöðina. Svæðið var afgirt og rannsóknarmenn og krufningalæknar rannsökuðu líkið sem ekki var flutt burtu fyrr en um áttaleytið um kvöldið.
Sjá nánar á Canarian Weekly.
