Lögreglan á höfuðborgarsvæðinu leitar nú að ökumanni bíls sem ók á konu á rafmagnshlaupahjóli á gangbraut í Lönguhlíð í Reykjavík, við Eskitorg, í dag, föstudaginn 9. maí.

Segir í tilkynningu að fyrrnefndur ökumaður hafi numið staðar á vettvangi og átti orðaskipti við konuna, en síðan ekið á brott á brott. Tilkynning barst klukkan 14.19, en ökumaður bílsins var farinn af vettvangi þegar lögreglan kom á staðinn.

Ökumaður rafmagnshlaupahjólsins var fluttur á spítala til aðhlynningar. Að hans sögn var bíllinns sem um ræðir blár jeppi og við stýrið var eldri kona.

„Við atvik eins og þetta er mikilvægt að ökumenn gangi úr skugga um að engin meiðsl hafi hlotist af né að skemmdir hafi orðið,“ segir í tilkynningunni. „Sömuleiðis er áríðandi að tilkynna málið til lögreglu, ekki síst vegna þess að áverkar eru ekki alltaf sjáanlegir á vettvangi.“

Lögreglan biður umræddan ökumann um að gefa sig fram en hafi aðrir orðið vitni að slysinu eru hinir sömu beðnir um að hafa samband í síma 444 1000. Upplýsingum um málið má einnig koma á framfæri í tölvupósti á netfangið gunnar.runar@lrh.is