Íslenskur maður sem býr í fjölbýlishúsi óttast að nágranni sinni á neðri hæð hyggist færa heitan pott framar á lóðina. Muni hann því hafa fólkið í pottinum fyrir augunum þegar hann fer út á svalir.
Maðurinn greinir frá þessu í færslu á samfélagsmiðlinum Reddit. Hafa um hann spunnist miklar umræður.
„Nágranni minn á jarðhæð í tveggja hæða fjölbýli er með pott, hann situr núna undir svölum og truflar lítið en ég veit að sama nágranna langar að byggja pall á sameignarfleti og hefur óskað eftir því við húsfélag sem og aðrir nágrannar á neðri hæð,“ segir hann.
Ef leyfi fáist óttast hann að granninn dragi pottinn undan svölunum og um það bil 2 metra út á pallinn. „Þetta hefur hvergi verið nefnt en ég sé í hvað stefnir mögulega,“ segir hann.
Svalir á efri hæð séu með gleri og væri þá útsýni beint ofan í pottinn.
„Væri þetta framkvæmanlegt án samþykkis allra í húsinu og er ég á einhvern hátt ósanngjarn ef ég vil ekki horfa á annað fólk baða sig af svölunum hjá mér?“ spyr hann.
Í athugasemdum er það nefnt að húsfélagið geti sett það sem skilyrði að ef ákveðið verði að leyfa pallinn þá fari potturinn ekki þangað.
„Ég myndi aldrei leyfa þetta, þetta gæti verið verðmætisrýrnun á hinum eignunum og kannski getur hann nýtt sér viðhalds dótarí á pallinum sínum á kostnað annarra út af sameignarlóð og þetta er örugglega alltaf að fara leiða útí einhverja vitleysu,“ segir einn. Það sé hroki að biðja um að fá að byggja á sameignarfleti fjölbýli og það sé aldrei skynsamlegt að leyfa það.
Aðrir nefna óhefðbundnar leiðir til þess að stoppa þetta.
„Ég veit um fólk sem lenti í svipuðu! Lausnin var að stara bara nógu mikið út um stofugluggann þegar fólkið var í pottinum. Þau færðu hann að lokum aftur nær húsinu og úr sjónlínu,“ segir einn.
„Þá er bara að míga í pottinn af svölunum þínum,“ segir annar.
