Ný ítölsk rannsókn virðist benda til þess að mikil neysla á kjúklingakjöti geti aukið líkurnar á því að fá 11 tegundir af krabbameini. Fram að þessu hefur kjúklingakjöt verið talið hættuminna en mikil neysla á rauðu kjöti en vísindamennirnir telja að hin nýja rannsókn geti kollvarpað þeim kenningum.

Í rannsókninni var fylgst með matarvenjum um 5.000 einstaklinga, flestum á fimmtugsaldri, í nærri tvo áratugi og áhrifanna á heilsu þeirra.

Niðurstöðurnar voru þær að þeir sem borðuðu yfir 300 grömm af kjúklingi á viku, sem er um fjórir skammtar, tvöfölduðu líkurnar á því að deyja af völdum krabbameins í meltingarveginum samanborið við þá sem borðuðu minna en einn skammt af kjúklingakjöti í viku hverri.

Þá virtist þetta orsakasamhengi vera sterkara hjá karlmönnum en öðrum kynjum.

Daily Mail fjallaði um rannsóknina en vísindamennirnir ítölsku, sem starfa hjá sérstakri meltingarstofnun í heimalandinu, hafa hins vegar ekki einhlítar skýringar á hvað veldur þessum auknu líkum á hættulegum sjúkdómum.

Ein kenning er sú að eldun kjúklingakjöts við háan hita valdi því að skaðleg efni myndist sem geta haft neikvæð áhrif á frumur líkamans og gert það að verkum að þær séu líklegri til að mynda krabbamein.

Önnur kenning er sú að hormónar eða lyf, sem stundum er dælt í kjúklinga utan Íslands, verði til þess að slík eiturefni myndast við eldun.

Af hverju karlmenn eru síðan líklegri til þess að verða fyrir neikvæðum áhrifum er eitthvað sem að þarfnast þó frekari rannsókna. Ein kenning varðandi það er að hormónabúskapur kynja er ólíkur.

Ýmsir vankantar eru þó á rannsókninni sem vísindamennirnir viðurkenna fúslega. Til að mynda er ekki haldið utan um það hvernig kjúklingurinn er eldaður, hvort það sé á pönnu, í ofni eða jafnvel á grilli sem og hvort að um skyndibita var að ræða eða máltíð eldaða heima fyrir.