Nýlega gagnrýndi Trump sjónvarpsstöðina CBS, í færslu á samfélagsmiðli sínum Truth Social, fyrir tvær fréttir í þætti af „60 Minutes“ og hvatti til að stöðin verði svipt útsendingarleyfi. Þetta var ekki í fyrsta sinn sem hann hefur haft í hótunum um slíkt.
CNN fór í gegnum ræður Trump og færslur hans á samfélagsmiðlum síðustu tvö árin til að kortleggja ummæli hans um að svipta eigi stóru sjónvarpsstöðvarnar útsendingarleyfi. Oft féllu þessu ummæli í tengslum við spurningar, sem var beint til hans, eða útsendingar sem honum líkaði ekki.
Trump getur ekki sjálfur svipt sjónvarpsstöðvarnar útsendingarleyfi en það getur vinur hans og samherji Brendan Carr sem Trump gerði að formanni FCC sem er nefnd sem hefur eftirlit með bandarískum útvarps- og sjónvarpsstöðvum.
FCC er skipað fimm aðilum, tilnefndum af forsetanum. Samkvæmt lögum mega aðeins þrír meðlimir nefndarinnar koma úr sama flokknum og hinir tveir koma þá úr hinum flokknum. Það eru því þrír Repúblikanar í henni núna og tveir Demókratar.
Trump skipaði Carr einni í nefndina á fyrra kjörtímabili sínu og nú var hann skipaður formaður.
Sýn og stefna Carr varðandi FCC er bæði skýr og aðgengileg. Hann skrifaði nefnilega kafla um hana í hina umdeildu „Project 2025“ áætlun sem er pólitísk áætlun sem var gerð af íhaldsmönnum lengst til hægri í bandarískum stjórnmálum. Áætlunin er hugsuð sem leiðbeiningarit fyrir íhaldssama stjórn Trump.
Trump sór af sér tengsl við áætlunina í kosningabaráttunni en stefnumál hans eru mörg eins og stefnumálin í áætluninni.
Carr hefur hafið rannsókn á starfsemi ríkisstyrktu miðlanna NPR og PBS sem hann sakar um að senda ólöglegar auglýsingar út. Báðir miðlarnir neita þessu.
Hann hefur hvatt þingið til að taka rannsókn hans með í reikninginn þegar það tekur afstöðu til hvort stöðvarnar eigi að halda áfram að njóta ríkisstuðnings. Í „Project 2025“ segir Carr að hætta eigi fjárstuðningi við stöðvarnar.
Hann hefur einnig sent símafélögunum Comcast og Verizon bréf og beðið þau um að hætta með fjölbreytileikaáætlanir sínar en Trump hefur lagt mikla áherslu á það síðan hann tók við forsetaembættinu.
Hann hefur einnig hafði nýja rannsókn á kvörtunum gagnvart frjálslyndu sjónvarpsstöðvunum CBS, ABC og NBC og hætt rannsókn á kvörtun gagnvart hinni íhaldssömu sjónvarpsstöð Fox News.
