Frans páfi lést í morgun um klukkan 5:30 að íslenskum tíma, 88 ára að aldri.
Sjá einnig: Frans páfi farinn á vit feðra sinna
Á meðal þeirra sem minnast páfans í dag eru Halla Tómasdóttir, forseti Íslands, sem skrifar á opinberri Facebook-síðu embættisins:
„Ég deili einlægum samúðarkveðjum vegna fráfalls Pope Francis. Heimurinn hefur misst mikilvægan leiðtoga sem hafði kærleika og umhyggju fyrir þeim sem minnst mega sín ávallt í fyrirrúmi og hvatti til ábyrgrar forystu. Megi þær áherslur lifa áfram í verkum okkar allra.“
Engar athugasemdir eru skrifaðar við færsluna, sem þó hefur vakið athygli. Illugi Jökulsson skrifar færslu á eigin Facebook-síðu:
„Sko. Ég er sérstaklega umburðarlyndur maður. En þetta hefði President Tomas nú alveg getað gert betur. Hún hefði til dæmis getað syrgt fráfall „Franciscus Papa“ ef henni er af einhverjum ástæðum illa við að nota hið íslenska „Frans páfa“. Hvorki páfinn né páfastóll hafa neitt sérstakt með enska tungu að gera.“
Egill Helgason umsjónarmaður Kiljunnar á RÚV segir einfaldlega „Úff“ og Margrét Tryggvadóttir rithöfundur og formaður Rithöfundasambands Íslands segir „Ó hvað þetta er innilega vont.“
Færslu forsetans var breytt um klukkustund eftir birtingu og þar stendur nú Frans páfi.
