Mikil öryggisgæsla er í kringum Vladímír Pútín, Rússlandsforseta, og mjög fáir vita um ferðir hans eða hvar hann dvelur hverju sinni. En Dossier, sem er hópur rússneskra rannsóknarblaðamanna í útlegð, hefur komist að því hvernig öryggissveit Pútíns, Sluzjba Bezopasnosti Prezidenta (SBP), starfar.

Dagbladet skýrir frá þessu og segir að Dossier hafi rætt við Gleb Karakulov, fyrrum yfirmann í rússnesku leyniþjónustunni FSO, um  þetta. Hann flúði frá Rússlandi 2022.

Hann sagði Dossier að þeir sem velja kandídata til starfa í lífvarðarsveit Pútíns noti mjög þróaðar aðferðir við vinnu sína, það sé gert til að finna örugglega réttu lífverðina.

Lífverðirnir þurfa að uppfylla margar kröfur. Þeir þurfa að vera í góðu líkamlegu formi, hafa reynslu af bardagaíþróttum, vera hávaxnir, stuttklipptir, nauðrakaðir og ekki með húðflúr.

Þeir verða einnig að ganga undir fjölda lygaprófa og fara margoft í sálfræðimat til að hægt sé að tryggja að þeir séu hundtryggir föðurlandsvinir.

Auk þess að notast við SBP, þá hefur Pútín einnig starfsfólk frá FSO í hlutverki kokka sem hafa hlotið sérstaka þjálfun í meðferð skotvopna og bardagaíþróttum.

Talið er að um 100 manns fylgi Pútín þegar hann leggur land undir fót. Þeirra á meðal eru lífverði, leyniskyttur, lífverðir með hunda og kafarar. Það eru aðeins lífverðirnir sem vita hver ferðaáætlun Pútíns er hverju sinni.

Til að rugla óvini forsetans í ríminu, eru bílalestir, með bílum forsetans, stundum sendar af stað til að láta líta út fyrir að hann hafi yfirgefið heimili sitt, þrátt fyrir að hann sé þar enn.