DV fjallaði í gær um bjórkvöld hlaðvarpsþáttarins Þjóðmála þar sem þeir Stefán Einar, Andrés Magnússon og Gísli Freyr Valdórsson fóru mikinn. Hæddust þeir til að mynda að Flokki fólksins og ráðherrum hans og töluðu mikið um mál Ásthildar Lóu Þórsdóttur.
Líktu þeir Ásthildi Lóu við heimsfrægan eltihrelli auk þess að fara rangt með staðreyndir í máli hennar. Hæddust þeir sömuleiðis að tungumálakunnáttu Guðmundar Inga og sögðu hann varla læsan.
Margir létu þremenningana heyra það í athugasemdakerfi DV og gerði Vísir umræðurnar að umtalsefni í frétt í morgun. Stefán Einar deilir þeirri frétt þar sem hann svarar fyrir sig.
„Í mínum huga er aðeins ein dauðasynd. Hún er sú að vera leiðinlegur. Ég ætla ekki að láta hana verða mér að aldurtila,“ segir hann.
„Bjórkvöld Þjóðmála eru skemmtidagskrá, galgopalegur gálgahúmor sem kann vel að fara fyrir brjóstið á einhverjum. En við því eru aðeins tvær lausnir og einfaldar. Fólk þarf ekki að mæta og það þarf ekki að hlusta,“ segir hann og endar færslu sína á þessum orðum:
„En hugsið ykkur gott fólk ef ekki mætti lengur gera grín að ráðherrum og næturbrölti þeirra við útihurðir ókunnugra? Við viljum alveg örugglega ekki lifa í svo forpokuðu og húmorslausu samfélagi. Eða hvað?“
Margir taka undir með Stefáni Einari, en ekki allir, til dæmis rithöfundurinn Guðmundur Andri Thorsson sem sat eitt sinn á þingi fyrir Samfylkinguna.
„Hér má vitna í gamlan Matthildarþátt og ritstjórann ykkar (sem er í raun og veru oft fyndinn): Þetta hefði verið fyndnara ef það væri húmor í því,“ sagði Guðmundur.
Stefán Einar svarar fyrir sig og dregur ekkert undan. „Hvaða vitleysa. Það mæta fleiri á hvert bjórkvöld hjá okkur en þeir sem kaupa bækurnar þínar. Heldur þú að það gerist vegna húmorsleysis?“
