Ágústa Ágústsdóttir, varaþingmaður Miðflokksins, steig í pontu á Alþingi í dag og opnaði sig um heimilisofbeldi sem hún sætti í 14 ár.
„Fyrsta sjokkið lausar tennur þegar hann keyrir höfuð hennar fullum þunga ofan í jörðina meðan tjaldstæðagestir horfa á en gera ekkert. Löggan sem sagði „kæra hann. Já, já, viltu ekki bara sofa á þessu í nótt og koma svo aftur á morgun? Hún vaknar reglulega við hann ofan á sér um miðjar nætur, brýtur alltaf öll mörk.“
Ágústa nafngreinir ekki manninn sem braut gegn henni í 14 ára sambandi þeirra. Maðurinn er Jón Þór Dagbjartsson, sem ákærður var í janúar fyrir tilraun til manndráps, með því að ráðast á Hafdísi Báru Óskarsdóttir, fyrrverandi sambýliskonu sína og barnsmóður á Vopnafirði. Þegar málið var þingfest 22. janúar í Héraðsdómi Austurlands neitaði hann sök og til vara fór lögmaður hans fram á að honum yrði ekki refsað þar sem hann hafi ekki stjórnað gjörðum sínum.
Sjá einnig: „Eftir situr heil fjölskylda í sárum sem mun seint eða aldrei ná sér að fullu“
Ágústa segir í ræðu sinni á þingi alltaf hafa sofið á varðbergi af því maðurinn hafi brjálast þegar börn þeirra skriðu upp í um nætur.
„Öskur, læti og ásakanir út af öllum mögulegum hlutum þangað til hún er orðin svo þreytt að það verður einfaldara að halda friðinn, spila leikinn, láta undan. Hvert á hún annars að fara? Vera meðvirk, verja hann í von um að einhvern tímann efni hann loforðin. Niðurlæging, lygar, niðurbrot. „Drullaðu þér frá andlitinu á mér áður en ég kúgast, ég kúgast ef ég horfi á þig.“ Svo læst hann kúgast. Ég elska þig. Ég veit ekki hvað ég myndi gera ef þú færir frá mér.“
Segist Ágústa hafa pakkað nauðsynlegustu fötum hennar og barnanna, skjálfandi af hræðslu yfir því að hann komi að henni.
„Áttir þú aldrei drauma? spyr hún. „Jú, að drepa þig,“ svo hlær hann. Hún er konan sem stendur hér í pontu Alþingis í dag. Fjórtán ár af ofbeldi. Það er ástæða fyrir því að ég á Schäferhund, ég get treyst því að hann verji mig, það gerir kerfið ekki.“
Ágústa segir raddir heyrast sem spyrji, hvað með konur sem ljúga?
„Með sömu rökum get ég sagt, bönnum öllum karlmönnum að vinna með börnum þar sem flestir barnaníðingar eru af því kyni. Erum við til í það? Ég held ekki.“
Þá segir Ágústa að einnig heyrist mæðulegar raddir, sem segi heimilisofbeldismál flókin mál.
„Nei, þau eru nefnilega alls ekkert flókin. Hættum að kyngera ofbeldi. Ofbeldi er ofbeldi sama hver beitir því. Á meðan löggjafarvaldið tekur sig ekki saman í andlitinu þá mun þessi faraldur halda áfram að blómstra í skugga þess. Vorkunn gagnast þolendum ekkert. Afstaða og aðgerðir gera það. Afleiðingar ofbeldis fylgja þolendum út lífið. Það eyðileggur líf og það tekur líf. Það hefur stór keðjuverkandi áhrif út í samfélagið okkar. Það sýkir það, veikir það, kostar það lýðheilsuna, geðheilsuna og sendi kynslóðir áfram veginn hölt og eða brotin.“
Í þessari frétt er fjallað um ofbeldi í nánu sambandi. Verðir þú fyrir ofbeldi í nánu sambandi eða ef grunur vaknar um slíkt er bent á lögreglu í síma 112, Kvennaathvarfið í síma 561-1205 og hjálparsíma Rauða krossins í 1717. Þá má nálgast leiðarvísi fyrir þolendur slíks ofbeldis á vef Neyðarlínunnar.
