Íris Helga Jónatansdóttir, 37 ára gömul kona frá Reykjanesbæ, er í umfjöllun Heimildarinnar í dag sögð vera sú sem ofsótt hefur fjölda manns undanfarin ár. Í umfjöllun blaðsins kemur fram að minnsta kosti þrír karlmenn hafi kært Írisi Helgu fyrir umsáturseinelti og að miðillinn hafi alls rætt við níu einstaklinga sem segja að þeir hafi orðið fyrir barðinu á henni.
Einn þeirra er dagskrárgerðarmaðurinn Garpur Ingi Elísabetarson en frásögn hans af ofbeldinu hefur vakið mikla athygli undanfarin misseri.
Sjá einnig: Garpur:„Þetta er það erfiðasta sem ég hef gengið í gegnum“
Sjálf hefur Íris Helga, sem þar til nýlega starfaði sem kennari, aðra sögu að segja. Í viðtali við Heimildina segist hún þvert á móti sjálf hafa orðið fyrir morðhótunum og ógnvekjandi heimsóknum auk þess sem fólk hafi elt hana inn í verslanir sveitarfélagsins.
Í umfjöllun Heimildarinnar kemur fram að Garpur Ingi, Sölvi Guðmundsson og annar ónefndur maður hafi, að eigin sögn, lent sérstaklega illa í Írisi Helgu en allir eiga þeir það sameiginlegt að hafa átt í ástarsambandi við hana.
Áreitið hefur sérstaklega verið í gegnum nafnlausa reikninga á samfélagsmiðlum og virðist tilgangurinn sérstaklega sá að fæla aðrar konur frá mönnunum, til að mynda með því að vara við Garpi á stefnumótasíðum með nafnlausum færslu. En að auki er áreitið sagt hafa beinst gegn vinum og vandamönnum mannanna, jafnvel börnum.
Rannsókn málsins stendur yfir en í greininni kemur fram að Íris Helga hafi verið kölluð í skýrslutöku vegna málsins. Eins og áður segir heldur hún því fram að málið sé á misskilningi byggt og að hún sé þolandinn í málinu.
