Trefjar í Hafnarfirði annast smíði á botnstykkjum í laxeldisker fyrir First Water. Fyrsta afhending fór fram í Þorlákshöfn á dögunum. 

„Þetta verkefni er til vitnis um jákvæð áhrif fiskeldisins á önnur fyrirtæki í landinu. Uppbygging First Water hefur verið hröð og það er gaman að eiga þátt í verkefni af þessari stærðargráðu. Það er magnað að sjá uppbygginguna í Þorlákshöfn og ekki víst að allir átti sig á stærðunum í þessu verkefni. Smíði fyrir fiskeldi er orðin æ fyrirferðameiri í starfseminni hjá okkur og fer vaxandi,“ segir Óskar Hafnfjörð Auðunsson, forstjóri Trefja.

Trefjar og First Water hafa starfað saman áður en Trefjar smíðuðu 400 rúmmetra ker fyrir seiðaeldi og 750 rúmmetra fyrir landeldi sem eru í notkun alla daga í Þorlákshöfn. Í þessum áfanga munu Trefjar afhenda First Water fimm mismunandi hluti úr trefjaplasti sem settir eru saman í eitt. Botnstykkið myndar nokkurs konar niðurfall sem notað er til að viðhalda hringrás vatnsinsog flytja lifandi fisk.

Trefjaplast er ótrúlega endingargott, sterkt, létt og efnaþolið að sögn Óskars svo það er kjörið í verkefni sem þessi. „Möguleikarnir til að móta og laga efnið eru endalausir og svo er vert að nefna að trefjaplast hefur mjög lítið kolefnisfótspor miðað við mörg önnur efni, svo sem stál og steypu.“ 

Til að bæta framleiðsluferlið og flýta fyrir hafa Trefjar fjárfest í 5-ása CNC-fræs. „Slík vél gerir okkur kleift að sérsmíða flókna íhluti á stuttum tíma á nákvæman hátt. Þannig getum við mætt þörfum viðskiptavina enn betur og er hluti af þeirri tækni- og sjálfvirknivæðingu semvið stöndum frammi fyrir núna,“ bætir Óskar við.