Þetta sagði Guðmundur Ari Sigurjónsson, þingmaður Samfylkingarinnar, í ræðu á Alþingi í vikunni en þar ræddi hann hamfarirnar sem urðu um síðustu helgi þegar sjór gekk á land á suðvesturhorni landsins. Mikið tjón varð til dæmis í Sandgerði og þá flæddi sjór og grjót yfir varnargarða í Reykjavík.
Guðmundur vísaði í byrjun ræðu sinnar til mikilla hamfara sem urðu hér á landi árið 1799.
„Árið 1799 þurrkaðist út heilt byggðarlag á einni nóttu þegar Básendaflóðin gengu yfir suðvesturströnd landsins. Sjór gekk á land, veikar varnir brotnuðu undan kraftinum og íbúar misstu heimili sín,“ sagði hann en flóðið varð á sama tíma og mjög kröpp lægð fór yfir landið. Kaupstaðurinn að Básendum varð rústir einar og fór í eyði.
„Þetta er hluti af íslenskri sögu en öldugangurinn sem gekk yfir landið síðustu helgi minnir okkur á að þessi saga er ekki liðin tíð. Við Seltirningar höfum reglulega heyrt sögur af Básendaflóðinu, um hvernig sjórinn gekk yfir landið, spillti bújörðum og rauf landið sem aðskildi Seltjörn frá sjónum en síðan þá hefur Seltjörn tilheyrt hafinu. Þetta var áfall sem íbúar gátu ekki varið sig gegn en í dag búum við yfir þekkingu, tækni og úrræðum sem geta komið í veg fyrir slíkar hamfarir, alla vega að þær verði jafn afdrifaríkar,“ sagði hann og spurði hvort að við ætlum ekki að nýta þessa þekkingu sem við höfum.
„Við vitum að aukin losun koltvísýrings veldur hlýnun jarðar sem leiðir til hækkandi sjávarstöðu. Við vitum að öflugir stormar munu verða tíðari og ágangur sjávar verður skæðari. Þetta eru staðreyndir — ekki spár, ekki tilgátur, heldur staðreyndir sem þegar eru farnar að hafa áhrif á íslenskt samfélag. Veðrið sem gekk yfir suðvesturhornið um helgina er ekki einstakt tilvik heldur hluti af miklu stærra mynstri sem við höfum val um hvort við ætlum að bregðast við eða láta yfir okkur ganga. Það er ekki bara siðferðisleg skylda okkar að bregðast við heldur er einnig grjóthart hagsmunamál þjóðar sem býr í slíkri nálægð við hafið að við drögum úr losun gróðurhúsalofttegunda og beitum okkur fyrir því á alþjóðavettvangi að aðrar þjóðir geri það líka,“ sagði hann.
Bætti hann við að stjórnvöld verði að tryggja fjármögnun í sjóvarnir á þeim svæðum sem eru í mestri hættu að verða fyrir tjóni.
„Síðasta ríkisstjórn náði ekki að koma sér saman um að afgreiða samgönguáætlun en í drögum að þeirri áætlun var einmitt gert ráð fyrir aukinni framkvæmdaþörf á sjóvörnum vegna hækkandi sjávarstöðu sem orsakast af hnattrænni hlýnun jarðar. Tjónið sem varð um helgina á heimilum og fyrirtækjum hleypur á hundruðum milljóna og það er ljóst að við höfum ekki efni á að gera ekki neitt.“
