Eigendur Animalíu, sem áður hét Dýralæknamiðstöðin í Grafarholti, játa fúslega að mistök hafi átt sér stað þegar hundshræ, sem eigandi hafði óskað eftir að yrði brennt og askan sett í ker, týndist hjá stofunni. Þetta kemur fram í skriflegu svari frá stofunni í kjölfar fréttar DV fyrr í dag.

„Það er rétt að um mistök af hálfu fyrirtækisins sé að ræða. Við hörmum að þessi mistök hafi átt sér stað, og höfum beðist innilegrar afsökunar við þá aðila sem að málinu komu. Þetta er sérstaklega erfitt mál, þar sem ekki er hægt að bæta það tilfinningalega tjón sem eigendur hafa orðið fyrir nú þegar,“ segir í tilkynningunni.

DV greindi frá því að Hjörleifur Davíðsson sagði farir sínar ekki sléttar af samskiptum sínum við Animalíu. Hann missti hundinn sinn um miðjan janúar og keypt þá áðurnefnda þjónustu frá Animalíu auk þess sem taka átti leirmót af loppufari hundsins. Þjónustan átti að taka fimm vikur en um sjö vikum síðar fór Hjörleifur að grafast fyrir um málið.

Þá kom í ljós að hundshræið hafði týnst og fátt var um svör hjá stofunni um hvað hafði orðið um það.

Í áðurnefndu svari frá Animalíu segir að umrætt atvik hafi átt sér stað þegar fyrirtækið starfaði enn undir merkjum Dýralæknamiðstöðvarinnar Grafarholti. „Nýir eigendur tóku við fyrirtækinu í byrjun janúar 2025, og hefur því miður ekki gefist kostur á að yfirfara alla verkferla fyrrverandi starfsemi. Við erum miður okkar að svona alvarlegt atvik hafi átt sér stað, en við munum sjá til þess að sérstaklega verði bætt úr þessu í starfsemi Animalíu,“ segir í tilkynningunni.

Starfsemi undir merkjum Animalíu hófst þann 1. mars síðastliðinn og er þjónustan með allt öðru sniði en sú sem var áður í boði í húsnæðinu. „Við bjóðum upp á sólarhringsopna bráðamóttöku fyrir gæludýr og leggjum mikið upp úr því að dýr og eigendur fái sem besta þjónustu.“