Kona sem var í starfi hjúkrunarfræðings á réttar- og öryggisgeðdeild Landspítala við Hringbraut var sakfelld fyrir lyfjastuld. Nánar tiltekið var henni gefið að sök að hafa á tímabilinu 9. september 2021 til 28. febrúar 2022, stolið úr lyfjaskáp samtals 21 töflu af bensódíazepin lyfinu Temesta (Lorazepam).

Dómur var kveðinn upp í málinu þann 12. febrúar en hefur fyrst verið birtur núna.

Konan játaði brotin og var það virt henni til refsilækkunar. Einnig hefur hún ekki áður gerst sek um refsiverða háttsemi. Einnig spilar inn í ákvörðun um refsingu að magnið sem var stolið var lítið.

Hins vegar segir í dómnum:

„Við ákvörðun refsingar er litið til þess að með brotum sínum misnotaði ákærða það traust og þann trúnað sem henni var sýndur í starfi sínu, auk þess sem brotavilji hennar var einbeittur. Þá var brotið framið í opinberu starfi sem horfir til refsiþyngingar […]“

Var konan dæmd í 30 daga skilorðsbundið fangelsi.