Aðalmeðferð verður í Héraðsdómi Reykjavíkur á mánudag í máli sem héraðssaksóknari hefur höfðað á hendur síbrotamanninum Kristjáni Markúsi Sívarssyni fyrir sérsaklega hættulega líkamsárás.

Kristján er sakaður um að hafa misþyrmt konu í að minnsta kosti tíu daga, á dvalarstað sínum í Hafnarfirði, til 10. nóvember 2024. Er hann í ákæru málsins, sem DV hefur undir höndum, meðal annars sakaður um að hafa slegið konuna víðsvegar í líkama og höfuð með hleðslusnúru, hamri, járnröri og tréspýtu, slegið hana í andlitið með kveikjara, lagt logandi sígarettur að hálsi hennar, tekið með höndum um háls hennar og þrengt að, stungið hana í líkamann með sprautunálum, skorið fótleggi hennar með hníf, stigið og traðkað á báðum fótleggjum hennar, sparkað víðsvegar í líkama hennar, hrækt framan í hana og skvett vatni á hana.

Hlaut konan margvíslega áverka af þessum misþyrmingum og sagði hjúkrunarfræðingur á bráðamóttöku Landspítalans að hún hefði aldrei séð aðra eins áverka (Sjá Vísir.is)

Haft var samband við lögreglu frá bráðamóttökunni eftir að konan leitaði aðhlynnningar þar. Sagði hún Kristján hafa veitt sér áverkana og var hann handtekinn á heimili sínu og vettvangur tryggður. Meðal þess sem fannst við húsleit á heimili hans var eitthvað af fíkniefnum og vopnum og er hann einnig ákærður fyrir vörslu þeirra.

Fyrir hönd brotaþola er krafist sex milljóna króna í miskabætur. Að auki er Kristján krafinn um að bæta henni sjúkrakostnað.

Kristján Markús Sívarsson á langan brotaferil að baki. Nýjasti dómurinn yfir honum féll í héraði rétt áður en þetta mál kom upp en þar var hann sakfelldur fyrir ofbeldi gegn konu árið 2022 og dæmdur í 16 mánaða fangelsi.

Sem fyrr segir verður aðalmeðferð í málinu við Héraðsdóm Reykjavíkur næstkomandi mánudag, kl. 9:30.