Stríðstrommurnar dynja í Evrópu á meðan Donald Trump reynir að semja um frið í stríðinu í Úkraínu við Rússa. Orðrómar segja að Rússar krefjist ekki bara mikillar eftirgjafar af hálfu Úkraínu, þeir vilji einnig að Bandaríkjamenn dragi sig alfarið frá Austur-Evrópu og í heildina má segja að grunnstoðir NATÓ standi á brauðfótum þessa dagana. Þetta hefur valdið miklum titringi og áhyggjum innan NATÓ og ESB.
Eftir því sem austurríski hernaðarsérfræðingurinn Gustav Gressel segir, þá hringja allar aðvörunarbjöllurnar núna. Hann er sérfræðingur í málefnum Rússlands og hergagnaiðnaðarins.
Hann óttast að Rússar muni fljótlega láta reyna á samstöðu NATÓ-ríkjanna.
„Af hverju ætti Pútín að láta þetta tækifæri ónotað? Ef það verðar frjálsar og heiðarlegar forsetakosningar í Bandaríkjunum eftir fjögur ár, þá kjósa Bandaríkjamenn kannski annan forseta og núna eru ESB-ríkin að byggja upp heri sína og endurlífga hergagnaframleiðsluna. Munu þeir bíða? Nú erum við með bandarískan forsetann sem vill ekki verja Evrópu. Þess vegna segi ég að Rússar muni gera árás um leið og þeir hafa gert út af við Úkraínu,“ sagði Gressel að sögn Ekstra Bladet.
Hann sagði það aðeins tímaspursmál hvenær Rússar sigra í stríðinu í Úkraínu ef Bandaríkjamenn hætta stuðningi sínum við Úkraínu en flest bendir nú til að þeir muni gera það. Hann telur að Donald Trump geti ekki samið um frið í Úkraínu og telur að Úkraínumenn geti aðeins haldið út á vígvellinum í eitt ár til viðbótar án stuðnings frá Bandaríkjunum.
„Rússar munu að sjálfsögðu ráðast á Evrópu. Þeir mun líklega ekki gera það eins og Sovétríkin höfðu í hyggju með stórri árás. Þeir munu þess í stað ráðast á eitt land í upphafi,“ sagði hann og bætti við að hann telji líklegt að það verði eitthvert af Eystrasaltsríkjunum.
Hann benti á að áður en Rússar réðust inn í Úkraínu hafi þeir ekki bara gert kröfu um að Úkraína sé hlutlaust ríki, þeir hafi einnig krafist þess að NATÓ myndi draga sig frá Austur-Evrópu. Þetta hafi því aldrei snúist um Úkraínu eina.
