„Ég tel fullt til­efni til þess að hald­inn verði auka­fund­ur þótt það sé ekki búið að mynda nýj­an meiri­hluta,“ segir Marta Guðjónsdóttir, borgarfulltrúi Sjálfstæðisflokksins, í viðtali við Morgunblaðið í dag.

Marta gagnrýnir þar að ekki hafi verið fundað um stöðuna sem uppi er í Breiðholtsskóla, en fimm tólf ára drengir hafa ítrekað beitt samnemendur sína ofbeldi. Foreldrar barna hafa gagnrýnt ráðaleysi skólayfirvalda í borginni vegna málsins en fundur borgarstjórnar var felldur niður í síðustu viku þar sem ekki er búið að mynda nýjan meirihluta.

Marta bendir á í viðtalinu að ábyrgð borgarfulltrúa minnki ekki við að ekki sé búið að mynda meirihluta og venjan sé sú að funda ef brýn mál koma upp.

„Ég tel fullt til­efni til þess að hald­inn verði auka­fund­ur þótt það sé ekki búið að mynda nýj­an meiri­hluta. Við erum enn að störf­um lög­um sam­kvæmt og ef brýn mál koma upp þá er venj­an að það sé fundað. Ég vona að það verði tekið vel í það og það verði boðað til fund­ar vegna þessa máls. Þetta er grafal­var­legt og spurn­ing hvort þetta sé ekki orðið barna­vernd­ar­mál ef ekki er hægt að taka á þessu máli.“

Bendir Marta á að sviðsstjóri skóla- og frístundasviðs eigi að vera að vinna í málinu en pólitískt kjörnir fulltrúar hafi ekki fengið upplýsingar um stöðu málsins.

Í annarri frétt Morgunblaðsins í dag er rætt um meirihlutaviðræðurnar og haft eftir Líf Magneudóttur, oddvita Vinstri grænna, að hún vonist til þess að viðræðurnar beri ávöxt í vikunni og nýr meirihluti verði myndaður. Ekki sé þó hægt að lofa neinu um það.